Aqtaý mańyndaǵy ótkir ıis: Ammıak qosylǵan sýdy dalaǵa tókken zaýytqa 6 mln teńge aıyppul salyndy
Mańǵystaý oblysy boıynsha ekologııa departamenti «QazAzot» AQ-ǵa jospardan tys tekserý júrgizip, ammıak kólemi ruqsat etilgen shekti kontsentratsııadan asyp ketkenin anyqtady.
Tekserý Basqudyq aýyly turǵyndarynyń shaǵymy boıynsha júrgizilgen.
«Onyń barysynda quramynda ammıak bar sýdy zańsyz aǵyzý faktisi anyqtaldy. Bul jańadan salynǵan «QazAzot» AQ «Zalalsyzdandyrý jáne býlaný bólimi» nysanyn paıdalanýǵa berilgen kezde oryn alyp otyr. Osy faktiler boıynsha departament mamandary sý synamalaryn alyp, atmosferalyq aýany ólshedi. Júrgizilgen taldaý nátıjesi sýdyń quramyndaǵy zııandy zattardyń jáne atmosferalyq aýadaǵy ammıak normalarynyń ruqsat etilgen shekti kontsentratsııadan asyp ketkenin kórsetti»- dedi Mańǵystaý oblystyq ekologııa departamenti basshysynyń orynbasary Maqsat Aısın.
Atalǵan ekologııalyq zańnamany buzý faktileri boıynsha «QazAzot» AQ QR ÁQBtK-niń 331-babynyń 1-bóligi jáne 328-babynyń 1-bóligi boıynsha ákimshilik jaýapkershilikke tartyldy.
Sondaı-aq kásiporynǵa zańbuzýshylyqty joıý jóninde nusqama berildi.
Aıta keteıik, sońǵy kezde turǵyndar tarapynan áleýmettik jeliler men baspasóz betterinde aýadaǵy jaǵymsyz ıis pen ammıak jóninde shaǵymdar jıilep ketken edi.