Aqtaý mańynda qoqıqazdardy vıdeoǵa túsirgen avtorǵa aıyppul salynbaıtyn boldy
Aıta keteıik, jaqynda áleýmettik jelide Mańǵystaý oblysy aýmaǵyna ushyp kelgen qoqıqazdardyń ádemi kórinisin kórsetetin vıdeo tarady.
Keıinnen vıdeo avtory Azamat Sársenbaevty «Ósimdikter ósetin jerler men janýarlardyń mekendeý ortasyn qorǵaý qaǵıdalaryn, zoologııalyq kollektsııalardy jasaý, saqtaý, esepke alý jáne paıdalaný qaǵıdalaryn buzý, sol sııaqty janýarlar túrlerin zańsyz qonys aýdartý, ıntrodýktsııalaý, reıntrodýktsııalaý» baby boıynsha ákimshilik jaýapkershilikke tartý áreketi bolǵandyǵy týraly habarlandy .
Osy jaıtty qarastyrý kezinde A. Sársenbaevqa aıyppul salynbaıtyn boldy. Vıdeo avtorymen profılaktıkalyq sharalar júrgizildi.
Bul jaǵdaı boıynsha Ekologııa mınıstrligi Qoǵammen baılanys departamentiniń dırektory Samal Ibraeva túsinik berdi.
«Bul keremet beıne túsirilim otandyq jáne álemdik buqaralyq aqparat quraldarynda jarııalandy. Osy oraıda túrli elderdegi kóp adamdar Qazaqstannyń tabıǵı ásemdigine tamsanǵanyn baıqadyq. Shynymen de, osyndaı ásemdik barshamyzdy tańǵaldyryp, bıoalýantúrlilik úshin qýanyshty boldyq. Degenmen kóptegen elder azamattaryn qyzyqtyrǵan osyndaı fotosýretter, vıdeo úshin avtorǵa qatysty nelikten sanktsııa salý múmkindigi bolǵanyn kópshilik túsinbedi. Bul turǵyda qoryqtar men qorǵalatyn aýmaqtarda vıdeoǵa túsirýdi retteıtin zańnama normalary bar», - dedi S. Ibraeva.
Onyń aıtýynsha, atalǵan aýmaqtarda túsirilim júrgizý úshin tıisti ruqsatty alý kerek. Ekinshiden, qorǵalatyn jerlerde janýarlar men qustardy mazalamas úshin bekitilgen erejeni ustaný qajet. Óıtkeni qoqıqaz óte saq qus bolǵandyqtan, qaýipti sezingen kezde uıasyn tastap ketýi múmkin. Sonymen qatar, vıdeony dronmen túsirý kezinde tıisti araqashyqtyqty saqtaý erejesi eskerilmegen.
«Sondyqtan atalǵan aýmaqtarda vıdeo túsirý jospary bolsa, baspasóz qyzmetine habarlasqan jón. Biz ótinimdi qarap, Orman sharýashylyǵy jáne janýarlar dúnıesi komıtetimen keliskenen keıin, ruqsat berý boıynsha jaýap beremiz. Árıne, bul protsesti jergilikti jerlerde ınspektorlar qadaǵalaıdy», - dep túsindirdi ol.