Aqtaý mańyndaǵy ushaq apaty boıynsha tergeýdiń esebi jarııalandy
ASTANA. KAZINFORM — QR Kólik mınıstrligi Aqtaý mańyndaǵy ushaq apaty boıynsha tergeý qorytyndylarynyń esebin jarııalady.
Azerbaijan Airlines áýe kompanııasynyń Embraer-190 ushaǵymen bolǵan oqıǵa sebepteri Kóliktegi oqıǵalar men oqys oqıǵalardy tekserý departamentiniń esebinde málim etilgen.
Aldyn ala esepte ázirge avıatsııalyq oqıǵany tergeý jónindegi komıssııaǵa kelip túsken qolda bar maǵlumat jazylǵan. Usynylǵan aqparat aldyn ala jazylǵandyqtan, barlyq materıal zertteý nátıjeleri boıynsha naqtylanýy jáne tolyqtyrylýy múmkin. Jumys aıaqtalǵannan keıin avıatsııalyq oqıǵany tergeý nátıjeleri boıynsha túpkilikti esep daıyndalady.
Osylaısha, qujatta atap ótilgendeı, 2024 jyldyń 25 jeltoqsanynda jergilikti ýaqyt boıynsha saǵat 11:28-de (06:28 UTC) Aqtaý áýe aılaǵynyń 11-shi ushý-qoný jolaǵyna qoný kezinde «Ázerbaıjan Hava Iollary» - «Azerbaijan Airlines» JAQ ıelik etetin Embraer 190-100 IGW2 4K-AZ65 ushaǵy avıatsııalyq apatqa ushyrady. Áýe kemesi Baký (UBBB)-Groznyı (URMG) baǵyty boıynsha turaqty J2– 8243 jolaýshylar reısin oryndaǵan. Groznyı aerodromyna eki ret qona almaǵandyqtan ekıpaj Bakýge oralýdy uıǵarǵan.
Ári qaraı, 05:13:31-de CVR-den alynǵan jazbalarda dybystyq soqqy tirkelgen, avtopılotty («AUTO PILOT») jáne avtomatty tartýdy (RI «Throttle») óshirý týraly dybystyq dabyl iske qosylǵan. Qaıtý protsesinde saǵat 05:13:32-de ushaqtyń negizgi basqarý júıeleri joǵalǵan.
05:13:34 – 3-shi gıdrojúıedegi qysym 0 PSI-ge deıin tómendegen. 3-shi gıdrojúıedegi suıyqtyq deńgeıi 0%-ǵa deıin tómendegen. Basqarý rýlderi nóldik kúıde bekitiledi jáne ushý aıaqtalǵansha osy qalypta qalǵan.
05:13: 36 –tangaj boıynsha áýe kemesin trımmerleý júıesiniń isten shyǵýy tirkelgen.
05:13: 39 – FDR málimetteri boıynsha, kabınanyń razgermetızatsııasy bastalǵany (sańylaýdyń paıda bolýy) tirkelgen.
05:13:47 – «HYD 2 LOW PRESS» dabyly iske qosylǵan. 1-shi gıdrojúıedegi qysym 0 PSI-ge deıin, suıyqtyq deńgeıi 0%-ǵa deıin tómendegen.
05:14: 58 - CVR málimetteri boıynsha, ishki baılanys komandıri jaǵdaıdy naqtylaý úshin kabına ekıpajyna habarlasqan: «Allo, ne bop qaldy?». Bortserik: «2 oryndyq jaryldy, men... kele almaımyn, óıtkeni jolaýshylar ornynan turyp ketti, solardy otyrǵyzyp jatyrmyn», - degen.
Saǵat 05:42-de ekıpaj apatty túrde qoný úshin Aqtaý qosalqy áýe aılaǵyna barý sheshimin qabyldaǵan.
Ushaq bortynda 5 ekıpaj múshesi men 62 jolaýshy bolǵan. Avıatsııalyq oqıǵa saldarynan áýe kemesiniń komandıri, ekinshi ushqysh, aǵa bortserik jáne 35 jolaýshy (barlyǵy 38) qaza tapty, 2 bortserik jáne 27 jolaýshy túrli dárejede dene jaraqatyn aldy. Jerge soqtyǵysý kezinde ushaq qırap, ishinara órtengen.
Tekserý jumystaryna ushaqty jasaǵan uıymnyń (Embraer S.A., Empresa Brasileira de Aeronautica S.A.) jáne «Ázerbaıjan Hava Iollary» JAQ («Azerbaijan Airlines») áýe kompanııasynyń ókilderi qatysýda.
Aıta keteıik, 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyraǵan bolatyn.
Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qalǵan edi.
Premer-mınıstrdiń orynbasary Qanat Bozymbaev ınternette taraǵan nusqa men «qara jáshiktegi» málimet arasynda úlken aıyrmashylyq bar ekenin aıtqan edi. Sondaı-aq ushaq apatyna baılanysty Reseıde, Qazaqstanda jáne Ázerbaıjanda qylmystyq is qozǵalǵan edi.
Buǵan deıin Brazılııa Áskerı-áýe kúshteriniń Áýe apattaryn zertteý ortalyǵynyń (Cenipa) mamandary AZAL áýe kompanııasynyń apatqa ushyraǵan Embraer 190 ushaǵynyń qara jáshigin taldaýǵa kiriskenin habarlaǵan bolatyn.
Qazaqstan Respýblıkasy Kólik vıtse-mınıstri Talǵat Lastaev QazAqparat tilshisine áýe apatyn tergeýdiń aldyn ala qorytyndysy qashan belgili bolatynyn aıtty.
30 jeltoqsanda Halyqaralyq áýe kóligi qaýymdastyǵy (IATA) oqıǵany jan-jaqty jáne beıtarap tergeýge shaqyrdy.
Jaqynda Kólik mınıstrligi Aqtaý mańyndaǵy ushaq apatyna qatysty málimdeme jasaǵan edi.