Ushaq apaty: Qaza tapqandardyń máıiti jaqyn arada Ázerbaıjanǵa jiberiledi
ASTANA. KAZINFORM — Áýe apatynan mert bolǵan jandardyń múrdesi Ázerbaıjanǵa jóneltiledi. Bul týraly atalǵan eldiń Tótenshe jaǵdaılar mınıstrligi men Azerbaijan Airlines áýe kompanııasynyń birlesken habarlamasynda aıtylǵan.
Qazaqstannyń Aqtaý qalasynyń mańynda Azerbaijan Airlines áýe kompanııasynyń apatynan qaza tapqan jolaýshylar men ekıpaj músheleriniń denesi jaqyn arada Ázerbaıjanǵa jetkiziledi.
Sonymen qatar, zardap shekken jandardy tasymaldaýǵa áýe kompanııanyń arnaıy reısi josparlanǵan. Olardy tasymaldaý zardap shekken jandardyń densaýlyq jaǵdaıy men dárigerlerdiń qorytyndysyna sáıkes jáne tasymaldaýdy júzege asyrýǵa múmkindik bergen jaǵdaıda ǵana júzege asyrylady.
Osyǵan baılanysty Ázerbaıjan men Qazaqstannyń quzyrly memlekettik organdary barlyq qajetti sharany qabyldap jatyr.
Buǵan deıin elimizdiń Tótenshe jaǵdaılar mınıstrligi Aqtaý qalasy mańyndaǵy áýe apatynan mert bolǵan otandastarymyzdyń aty-jónin jarııalady.
Úkimet basshysynyń orynbasary Qanat Bozymbaev ushaqtyń qırandysy arqyly apattyń sebep-saldary anyqtalatynyn aıtqan edi.
Aıta keteıik, atalǵan áýe apatynan zardap shekkenderge jan-jaqty kómek kórsetiledi. Ol boıynsha qaıda habarlasý kerektigin siltemege ótip bile alasyz.
Ókinishke qaraı, elimizdiń Kólik mınıstri Marat Qarabaev ushaq bortynda bolǵan barlyq qazaqstandyq mert bolǵanyn habarlady.