Aqtaý mańyndaǵy ushaq apatynan aman qalǵan qyrǵyzstandyq komadan shyqty

ASTANA. KAZINFORM – Aýrýhanadaǵy Qyrǵyzstan azamaty komadan shyǵyp, týysyn tanydy. Bul týraly elimizdiń Densaýlyq saqtaý mınıstrligi habarlaıdy.

- Búginde Mańǵystaý oblystyq kópbeıindi aýrýhanasynda 6 patsıent, onyń tórteýi reanımatsııa bólimshesinde jáne ekeýi travmatologııada em alyp jatyr. Jaǵdaıdyń nasharlaýy baıqalmaıdy, 2 patsıent tonıkter men medıtsınalyq sedatsııadan alyndy. Durys tańdalǵan qarqyndy terapııanyń arqasynda qyrǵyzstandyq patsıent travmatıkalyq shoktan keıin esin jıyp, týystaryn tanydy jáne qazir otanyna oralýǵa daıyn. Qyrǵyz dárigerleriniń áýe bortyn kútip otyrmyz, - delingen habarlamada. 

Odan bólek, Qyrǵyzstannyń taǵy eki azamatyn jáne Ázerbaıjannan zardap shekkenderdi erteń otanyna arnaıy borttarmen evakýatsııalaý josparlanýda. 

- Aqtaý qalasyndaǵy áýejaı mańynda jolaýshylar ushaǵynyń apatqa ushyraýy saldarynan zardap shekken 29 adamnyń 27-si Mańǵystaý oblystyq aýrýhanasyna jetkizildi. Patsıentter ártúrli jaraqattarmen, ıaǵnı jabyq mı jaraqaty, mıdyń shaıqalýy, keýde qýysynyń jabyq jaraqattary, travmatıkalyq shok, - deıdi vedomstvodan. 

Apattan aman qalǵan jandarǵa kómekke Mańǵystaý oblysynyń 22 jedel medıtsınalyq járdem brıgadasy jáne apattar medıtsınasy ortalyǵynyń 6 brıgadasy jumyldyryldy. 

Aıta kestek, Ázerbaıjannyń Densaýlyq saqtaý mınıstri Qazaqstan dárigerlerine alǵys aıtty.

Eske salaıyq, 25 jeltoqsanda Aqtaý mańynda Azerbaijan Airlines ushaǵy apatqa ushyrady. 

Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty. Ókinishke qaraı, mert bolǵan jandardyń arasynda 6 Qazaqstan azamaty bar.