Aqtaý mańyndaǵy ushaq apaty: Zardap shekken 6 adamnyń jaǵdaıy turaqtandy

ASTANA. KAZINFORM — Búgingi tańda Mańǵystaý oblystyq kópbeıindi aýrýhanasynda 6 patsıent emdelýde, onyń tórteýi reanımatsııa bólimshesinde, ekeýi travmatologııada. Jaǵdaıdyń nasharlaýy baıqalmaıdy, bir patsıent vazopressorlardan shyǵarylady jáne bir zardap shekken adamnyń tonıkteriniń dozasy 3-ten 1-ge deıin tómendetildi.

Bul derekti Densaýlyq saqtaý mınıstrligi taratty. 

- Qyrǵyzstan Respýblıkasy densaýlyq saqtaý organdarymen 3 zardap shekken adamdy tasymaldaý boıynsha máseleler pysyqtalýda, onyń ishinde 2 tasymaldanatyn, 1 - aýyr jaǵdaıda, ÓJJ apparatynda jatyr.

Ázerbaıjan Respýblıkasynan eki patsıentti evakýatsııalaý máselesi boıynsha dárigerlermen konsılıým ótkizý, olardyń tasymaldaý jaǵdaıyndaǵy jaı-kúıine baǵa berý josparlanýda, dep jazdy vedomstvodan.

Aqtaý qalasyndaǵy áýejaı mańynda jolaýshylar ushaǵynyń apatqa ushyraýy saldarynan zardap shekken 29 adamnyń 27-si Mańǵystaý oblystyq aýrýhanasyna jetkizildi.

Patsıentter ártúrli jaraqattarmen, negizinen birneshe zaqymdarmen kelip tústi, bul mıdyń jabyq jaraqaty, mıdyń shaıqalýy, keýde qýysynyń jabyq jaraqattary, travmatıkalyq shok.

Keme apatynan keıin 10 mınýttyń ishinde zardap shekkenderge medıtsınalyq alǵashqy kómek kórsetý úshin Mańǵystaý oblysynyń 22 jedel medıtsınalyq járdem brıgadasy men apattar medıtsınasy ortalyǵynyń 6 brıgadasy oqıǵa ornynda boldy.

Zardap shekkenderdi Aqtaý qalasynyń statsıonarlaryna ýaqtyly emdeýge jatqyzý, bilikti irikteý jáne alǵashqy syn saǵattarda tolyq emdeý-dıagnostıkalyq kómek kórsetýdiń arqasynda 29 adamnyń ómirin saqtap qalýǵa múmkindik týdy.

Sondaı-aq, qarapaıym adamdar, ártúrli óńirlerden kelgen otandastarymyz beı-jaı qaramaı, qıyndyqqa birden jaýap berdi.

Eki kúnniń ishinde respýblıka boıynsha qan ortalyqtarynda 1,5 myńnan astam adam 800 lıtr qan tapsyrdy. Aqtaýdyń ózinde donorlyq pýnktterge 490 adam keldi, Astanada – 600 – den astam adam, Shymkentte – 125, Aqtóbede – 109, Jetisýda – 49, Qaraǵandyda-40, ShQO-34 adam qan tapsyrdy jáne basqa óńirlerde de adamdar bul apatqa beı-jaı qaraǵan joq.

Densaýlyq saqtaý mınıstrligi bizdiń medıtsına qyzmetkerlerine kómektesken, qaıǵyly ushaq apatynan zardap shekkenderge qan tapsyrýǵa qatysqan barlyq azamattarǵa alǵysyn bildiredi.

Aıta keteıik, ushaq apaty kezinde oqıǵa ornyna eń birinshi jetken aqtaýlyq áskerı qyzmetker sol sáttegi áserimen bólisti.