Aqtaý mańyndaǵy ushaq apaty: Vladımır Pýtın Ilham Álıevten keshirim surady

ASTANA. KAZINFORM — Reseı tarapynyń bastamasymen Vladımır Pýtın Ázirbaıjan Respýblıkasynyń Prezıdenti Ilham Álıevpen telefon arqyly sóılesti.

25-jeltoqsan kúni Qazaqstannyń Aqtaý qalasyna jaqyn mańda Ázerbaıjan áýe kompanııasynyń jolaýshylar ushaǵynyń apatqa ushyraýyna qatysty máseleler jan-jaqty talqylandy.

Vladımır Pýtın qaıǵyly oqıǵanyń Reseı áýe keńistiginde oryn alǵany úshin keshirim surap, qaza bolǵandardyń otbasylaryna taǵy da tereń kúızelispen kóńil aıtty. Sonymen birge zardap shekkenderdiń tezirek saýyǵyp ketýin tiledi.

Áńgime barysynda keste boıynsha ushatyn Ázirbaıjannyń jolaýshylar ushaǵy Groznyı áýejaıyna birneshe ret qonýǵa árekettengeni aıtyldy. Sol kezde Groznyı, Mozdok jáne Vladıkavkazǵa ýkraınalyq jaýyngerlik ushqyshsyz ushatyn apparattar shabýyl jasaǵan, al reseılik áýe qorǵanys júıeleri bul shabýyldarǵa toıtarys bergen.

Reseıdiń Tergeý komıteti QK 263-baby (Áýe kóligin paıdalaný jáne qozǵalys qaýipsizdigi qaǵıdalaryn buzý) boıynsha qylmystyq is qozǵady. Bastapqy tergeý áreketteri júrgizilip, azamattyq jáne áskerı mamandardan jaýap alynýda.

Qazir Ázerbaıjan Bas prokýratýrasynyń eki qyzmetkeri Groznyıda júr, olar Reseı Federatsııasynyń Bas prokýratýrasy men Tergeý komıtetiniń ókilderimen birlese jumys istep jatyr. Reseı, Ázerbaıjan jáne Qazaqstannyń tıisti qyzmetteri Aqtaý qalasynyń irgesindegi apat ornynda tyǵyz yntymaqtastyqta jumys júrgizýde.

Aıta keteıik, Ashhabad - Máskeý - Ashhabad baǵytynda ushatyn turaqty reıster toqtatyldy.