Aqtaý mańyndaǵy ushaq apaty: taıaýda Qazaqstan tergeý aqparatyn jarııalaıdy

ASTANA. KAZINFORM – Búgin Úkimet otyrysynan keıingi baspasóz máslıhatynda Kólik vıtse-mınıstri Maqsat Qalıaqparov Aqtaýda Ázerbaıjan ushaǵynyń apatyn tergeý jumystaryna qatysty túsinik berdi.

- Qazirgi ýaqytta osy tergeý amaldary jalǵasyp jatyr. Úsh aıdan keıin alǵashqy aldyn ala qorytyndyny tolyq kólemde tıisti komıssııa tanystyrdy. Atap aıtqanda, qazir egjeı-tegjeıli tártipte tekserýler tereńirek júrip jatyr. Bul turǵyda aıtarlyqtaı kúrdeli saraptamalar eskerilgen, - dedi M. Qalıaqparov tilshiler suraǵyna jaýap bere otyryp.

Onyń sózine qaraǵanda, bul jumystar aıaqtalǵannan keıin, tolyq esep BAQ-qa jarııalanady.

- Ázirge, onyń qashan shyǵatynyn aıta almaımyz... Biraq, jyl sońyna qaraı tıisti málimetti joldaımyz, - dedi vıtse-mınıstr.

Aıta keteıik, 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyraǵan bolatyn. https://kaz.inform.kz/news/aktauda-ushak-kuladi-a3b704/
Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.

Buǵan deıin ushaq apatynyń sebebi jyl sońyna deıin anyqtalatyny aıtylǵan edi.