Aqtaý mańyndaǵy ushaq apaty: Reseıde, Qazaqstanda jáne Ázerbaıjanda qylmystyq is qozǵaldy

ASTANA. KAZINFORM — Ázerbaıjannyń bas prokýrory Kamran Álıev Aqtaý mańynda Ázerbaıjan áýe kompanııasy ushaǵynyń apatqa ushyraýyna qatysty Qazaqstan men Reseıdiń tıisti qurylymdary — prokýratýra jáne quqyq qorǵaý organdarymen birlesip tergeý júrgizip jatqanyn málimdedi.

Bul týraly Trend.az habarlady.

— Ázerbaıjan basshysy Ilham Álıevtiń tapsyrmasymen Aqtaý mańyndaǵy AZAL ushaǵynyń apatqa ushyraýyn tergeýge baılanysty barlyq múddeli memlekettik organdar jumyldyrylyp, óz mindetterine sáıkes tapsyrmalardy oryndap jatyr. Áýe apatyna qatysty úsh elde qylmystyq is qozǵaldy: Reseı, Qazaqstan jáne Ázerbaıjan. Qazaqstan, Ázerbaıjan jáne Reseıdiń tıisti organdary dáleldemelerdi jınady, keıinnen olarǵa qylmyskerlerdi anyqtaý úshin birlesip taldaý jasalady. Qazirgi ýaqytta Reseıdiń Tergeý komıteti men Bas prokýratýrasy bul baǵytta tıisti tergeý amaldaryn júrgizip jatyr, — dedi Kamran Álıev.

Aıta keteıik, 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyraǵan bolatyn.

Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.

Buǵan deıin QazAqparat Brazılııa Áskerı-áýe kúshteriniń Áýe apattaryn zertteý ortalyǵynyń (Cenipa) mamandary AZAL áýe kompanııasynyń apatqa ushyraǵan Embraer 190 ushaǵynyń qara jáshigin taldaýǵa kiriskenin habarlaǵan bolatyn.

Qazaqstan Respýblıkasy Kólik vıtse-mınıstri Talǵat Lastaev QazAqparat tilshisine áýe apatyn tergeýdiń aldyn ala qorytyndysy qashan belgili bolatynyn aıtty.
30 jeltoqsanda Halyqaralyq áýe kóligi qaýymdastyǵy (IATA) oqıǵany jan-jaqty jáne beıtarap tergeýge shaqyrdy.

Jaqynda QR Kólik mınıstrligi Aqtaý mańyndaǵy ushaq apatyna qatysty málimdeme jasady.