Aqtaý mańyndaǵy ushaq apaty qalaı boldy

ASTANA. KAZINFORM – Elimizdiń Kólik mınıstri Marat Qarabaev Aqtaý mańyndaǵy ushaq apatynyń qalaı bolǵanyn aıtyp berdi.

— Ushaq Qazaqstannyń áýe keńistigine engennen keıin Aqtaý qalasyndaǵy munara dıspetcherimen baılanys ornatqan. Dıspetcher ushaqty áýejaıǵa qondyrý boıynsha qajetti sharalardy der kezinde qabyldap úlgergen. Ushý-qoný jolaǵymen vızýaldy baılanys ornatýdy jeńildetý úshin shamdary qosylǵan, — dedi Marat Qarabaev Aqtaýda ótken baspasóz máslıhatynda. 

Mınıstrdiń málimdeýinshe áýe ekıpajy Aqtaý áýejaıynyń ushý-qoný jolaǵyna jaqyndaýǵa eki ret áreket jasaǵan. 

— Sol kezde áýe kemesinde retsiz ózgerister baıqaldy. Ushaq jaǵalaý syzyǵyna qaraı aýytqıdy, saǵat 11:28–de ekıpajben baılanys úzilip, jerge qulady. Búginde arnaıy komıssııa tergeý júrgizip jatyr, onyń quramyna kóliktegi oqıǵalar men oqıǵalardy tergeý departamentiniń mamandary kirdi, — deıdi vedomstvo basshysy. 

Buǵan deıin Úkimet basshysynyń orynbasary Qanat Bozymbaev Aqtaý mańyndaǵy ushaq apatynyń sebebine qatysty túsinik berdi.