Aqtaý mańyndaǵy ushaq apaty: Ázerbaıjan syrtqy ister mınıstri qazaq halqyna alǵys aıtty
ASTANA. KAZINFORM — Búgin elordaǵa Ázerbaıjan Respýblıkasynyń Syrtqy ister mınıstri Djeıhýn Baıramov resmı saparmen keldi.
Sapar aıasynda ázerbaıjandyq mınıstr Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileýmen shaǵyn jáne keńeıtilgen quramda kelissózder ótkizdi.
— Ótken jyly 25 qazanda Aqtaý qalasy mańynda bolǵan ushaq apatynda qazaq halqyna izdeý sharalaryna jedel kómek kórsetkeni úshin rızashylyǵymdy bildiremin. Eki el arasynda ultaralyq, tarıhı, dinı jáne senimdi, ári berik qarym-qatynas ornaǵan. Bul bizdiń strategııalyq seriktestigimizdiń negizi. Qazaqstan Respýblıkasy Prezıdentiniń Ázerbaıjanǵa úsh sapary jáne Ázerbaıjan Prezıdentiniń Qazaqstanǵa eki sapary bul ekijaqty joǵary qarym-qatynastyń kórinisi, — dedi Djeıhýn Baıramov BAQ ókilderi aldynda málimdeme jasaı turyp.
Mártebeli meımannyń málimdeýinshe, dostyq qatynastan bólek, eki el arasyndaǵy ekonomıkalyq jáne saýda salasy da qarqyndy damyp keledi.
— Ekijaqty 2025-2026 jyldarǵa arnalǵan is-qımyl kartasy aıasynda kún tártibindegi barlyq máseleni talqyladyq. Sonymen qatar BUU, TúrikPA aıasyndaǵy baılanysty nyǵaıtýǵa basymdyq berildi. Túrli sala boıynsha bastamalarǵa qoldaý kórsetýge kelistik. Qazaqstan bizdiń memlekettiń bastamasyn qoldady. Ótken jyldyń qorytyndysy boıynsha ekijaqty saýda-sattyq 500 mln dollarǵa jetti, — deıdi ol.
Eske sala keteıik, byltyr 25 jeltoqsanda Aqtaý mańynda Azerbaijan Airlines ushaǵy apatqa ushyrady. Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.
Keıin Brazılııa Áskerı-áýe kúshteriniń Áýe apattaryn zertteý ortalyǵynyń (Cenipa) mamandary AZAL áýe kompanııasynyń apatqa ushyraǵan Embraer 190 ushaǵynyń qara jáshigin taldaýǵa kiriskenin habarlaǵan bolatyn.
Bıyl 4 aqpanda Aqtaý mańyndaǵy ushaq apaty boıynsha tergeýdiń esebi jarııalandy.