Aqtaý mańyndaǵy ushaq apaty: Ázerbaıjan prokýrorlary Groznyıǵa keldi
ASTANA. KAZINFORM - Bul týraly Ázerbaıjan Bas prokýratýrasynyń baspasóz qyzmetiniń resmı málimdemesinde aıtylǵan.
- Ázerbaıjan Respýblıkasynyń Prezıdenti Ilham Álıevtiń tapsyrmasyna sáıkes, Aqtaý qalasynyń mańyndaǵy jolaýshylar ushaǵynyń apatqa ushyraý faktisi boıynsha qozǵalǵan qylmystyq istiń obektıvti shyndyǵyn anyqtaý úshin shuǵyl jáne qajetti sharalar qabyldanyp jatyr. Osy maqsatta Bas prokýratýranyń bir top qyzmetkerleri Groznyı qalasyna jiberilip, Reseı Federatsııasynyń Bas prokýratýrasymen jasalǵan kelisimge sáıkes osy mekemedegi áriptesterimen birlesip tergeý jáne basqa da protsessýaldyq áreketterdi júrgizedi, - delingen vedomstvo habarlamasynda.
Buǵan deıin Ázerbaıjan bas prokýrorynyń orynbasary Elmar Djamalovtyń jetekshiligimen Qazaqstanǵa tergeý tobyn jibergen bolatyn. Ázerbaıjan tarapy sondaı-aq Qazaqstan Respýblıkasynyń Bas prokýratýrasynan is boıynsha tıisti tergeý jáne basqa da qajetti protsessýaldyq áreketterdi júrgizý úshin quqyqtyq kómek kórsetýdi surady.
Jeltoqsannyń 26-sy kúni QR Premer-Mınıstriniń orynbasary Qanat Bozymbaev Reseı men Ázerbaıjannyń quqyq qorǵaý organdaryna qylmystyq isti tergeýge (QR Qylmystyq-protsestik kodeksine sáıkes) qatysýǵa ruqsat berilmeıtinin, alaıda ushaq apatyna qatysty iske qatysýǵa ruqsat etiletinin aıtty.
Sondaı-aq, Brazılııadan Aqtaýǵa ushaq óndirýshi Embraer kompanııasynyń taǵaıyndalǵan ókilderi keldi.