Aqtaý mańynda ushaq apatynan qaza tapqan Ázerbaıjan azamattarynyń nesıelik mindettemeleri óteldi
ASTANA. KAZINFORM – Bul týraly Ázerbaıjan bankter qaýymdastyǵy men Ázerbaıjan mıkroqarjy qaýymdastyǵynyń birlesken málimdemesinde aıtylǵan, dep habarlaıdy Kazinform tilshisi Trend-ke silteme jasap.
— 2024 jylǵy 25 jeltoqsanda «Ázerbaıjan áýe jelileri» áýe kompanııasynyń Baký-Groznyı reısin oryndaǵan ushaqtyń Aqtaý qalasynyń mańynda apatqa ushyrap, ekıpaj músheleri men jolaýshylardyń qaza tabýy búkil Ázerbaıjan halqyn da, bank qaýymdastyǵyn da qatty kúızeltip, qaıǵyrtty.
Osy qaıǵyly oqıǵaǵa baılanysty Ázerbaıjan Respýblıkasy Ortalyq bankiniń usynysy boıynsha jáne Ázerbaıjan bankter qaýymdastyǵy (ÁBQ), Ázerbaıjan mıkroqarjy qaýymdastyǵynyń (ÁMQQ) bastamasymen áýe apaty saldarynan qaıtys bolǵan Ázerbaıjan azamattarynyń nesıelik mindettemeleri bankter men banktik emes nesıe uıymdarynda tıisti uıymdardyń jeke qarajaty esebinen tolyq esepten shyǵaryldy», - delingen birlesken habarlamada.
Osyǵan deıin habarlaǵanymyzdaı, Aqtaýda Azerbaijan Airlines ushaǵy apatqa ushyrady.
Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty.