«Qara jáshikti» oqýǵa neshe kún ketedi - avıatsııa ınjeneriniń jaýaby
ASTANA. KAZINFORM — Qazaqstannyń Qurmetti avıatory, avıatsııa ınjeneri Erǵazy Joldasov Aqtaýdan 3 shaqyrym jerde qulaǵan Embraer ushaǵynyń «qara jáshigin» Brazılııanyń CENIPA ortalyǵyna tapsyrý týraly sheshimine qatysty pikir bildirdi.
— «Qara jáshikti» oqý óte mańyzdy. Óıtkeni, apatqa baılanysty kópti tolǵandyrǵan barlyq suraqqa naqty jaýapty sol jerden ǵana tabýǵa bolady. Qara jáshiktiń mańyzy da, ushaqtaǵy qyzmeti de sol. Ony naqty pysyqtap, komıssııa músheleri birigip ashyp, tyńdaýy kerek. «Qara jáshikti» ashqan kezde osy apatqa qatysy bar elderdiń báriniń ókilderi, ICAO ókilderi qatysqany jón. «Qara jáshik buzylmasa, synbasa nemese jarylmasa aqparatyn oqý kópke sozylmaýy kerek, bir aıda sheshilýi múmkin. Biraq qara jáshikten málimet alǵan soń bir angarǵa ushaqtyń bólshekterin jınastyryp, modelin qaıta qurastyrady. Osy jumys biraz ýaqyt alýy múmkin. Osydan keıin ǵana qorytyndy shyǵarady, — deıdi avıatsııa ınjeneri.
Sondaı-aq, ol jazbalardy oqıtyn tarap retinde Brazılııanyń tańdalýy apatqa qatysy bar elderdiń ortaq sheshimi dep topshylaıdy.
— Bul suraqqa men eshqandaı saıası astardy qarastyrmaı, avıatsııa ınjeneri retinde ǵana jaýap bere alamyn. «Qara jáshikti» Brazılııa ortalyǵynda qarastyrýy komıssııa músheleriniń ortaq sheshimge kelgeni bolýy kerek. Bul — Qazaqstan tarapynan durys sheshim dep oılaımyn. Óıtkeni, ushaqqa syrttan bolǵan qaqtyǵys nusqasyn qarastyratyn bolsa, Brazılııa — ushaqty qurastyrýshy memleket. Ózim Brazılııadaǵy ortalyqtyń tájirıbeli ekenin bilgendikten, ádiletti zertteý júrgizedi dep senemin. Olar ushaqtyń tolyǵymen qalaı jumys istegenine obektıvti baǵa bere alady dep oılaımyn. Burmalap basqasha sheshim shyǵarý ózderine keri áserin tıgizedi. Óıtkeni, «Qara jáshikti» oqıtyn ınstıtýt Reseıde de bar, — deıdi Erǵazy Joldasov.
Eske sala keteıik, 25 jeltoqsanda Aqtaý mańynda Azerbaijan Airlines ushaǵy apatqa ushyrady. Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty. Ókinishke qaraı, mert bolǵan jandardyń arasynda 6 Qazaqstan azamaty bolǵan.
IKAO usynymdaryn eskere jáne Ázerbaıjan men Reseıdiń avıatsııalyq bılik ókilderimen keńese otyryp, QR Kólik mınıstri Marat Qarabaev basqaratyn avıatsııalyq oqıǵany tergeý jónindegi Komıssııa borttyq ózdiginen jazǵyshtardy (qara jáshikterdi) Embraer áýe kemesin shyǵarýshy Brazılııanyń avıatsııalyq oqıǵalardy tergeý jáne aldyn alý ortalyǵyna (CENIPA) jiberý týraly sheshim qabyldady.
Buǵan deıin habarlaǵanymyzdaı, belgili áskerı sarapshy Amangeldi Qurmetuly Aqtaýdan 3 shaqyrym jerde qulaǵan Embraer ushaǵynyń «qara jáshigin» Brazılııanyń CENIPA ortalyǵyna tapsyrý týraly sheshimine qatysty pikir bildirdi.