Aqtaý mańyndaǵy AZAL ushaǵynyń apaty: RF Tergeý komıteti saraptama taǵaıyndady
ASTANA. KAZINFORM – Dıspetcherlik qyzmet, áýe qozǵalysyn uıymdastyrý júıesi jáne áýe shabýylyna qarsy qorǵanys júıesi laýazymdy tulǵalarynyń áreketin baǵalaý úshin keshendi uıymdastyrý-tehnıkalyq sot-medıtsınalyq saraptama komıssııasy taǵaıyndaldy. Bul týraly RF Tergeý komıteti málim etti.
- Reseıdiń Tergeý komıteti 2024 jylǵy 25 jeltoqsanda Qazaqstan Respýblıkasynyń aýmaǵynda 39 adamnyń qaza bolýyna jáne 28 adamnyń densaýlyǵyna zııan keltirilýine (RF QK 263-baby) ákelgen «Ázerbaıjan áýe jelileri» áýe kompanııasynyń Embraer-E190 ushaǵynyń apatqa ushyraýy boıynsha qylmystyq isti tergeý amaldaryn jalǵastyryp otyr, - delingen RF TK resmı ókili S. Petrenkonyń málimdemesinde.
Atap kórsetilgendeı, tergeý Ázerbaıjan Respýblıkasy men Qazaqstan Respýblıkasynyń quzyrly organdarymen árekettestik ornatqan. Memleketaralyq avıatsııa komıtetiniń mamandarymen birlese otyryp Brazılııanyń avıatsııalyq oqıǵalardy tergeý jáne aldyn alý ortalyǵynda (SENIPA) ushaqtyń ózdiginen jazǵysh quralyndaǵy derekter zerttelý ústinde.
Groznyı, Mahachkala jáne Mıneralnye vody dıspetcherleri men áýe kemesiniń komandıri arasyndaǵy áńgimeler taldanyp jatyr. Keshendi avıatsııalyq-tehnıkalyq saraptama taǵaıyndaldy. Áýe kemesiniń barlyq júıeleriniń jaǵdaıy, sondaı-aq zattaı aıǵaqtar zerttelip jatyr.
Tergeý qaıǵyly oqıǵanyń sebepterine qatysty barlyq yqtımal nusqalardy qarastyrady.
Aıta keteıik, 25 jeltoqsanda Aqtaý qalasyna jaqyn jerde AZAL-ǵa tıesili jáne Baký-Groznyı reısin oryndaǵan jolaýshylar ushaǵy apatqa ushyraǵan bolatyn. Ushaq bortyndaǵy 67 adamnyń 38-i qaza taýyp, 29-y aman qaldy.
Eske sala ketsek, buǵan deıin Brazılııa Aqtaý mańynda apatqa ushyraǵan AZAL ushaǵynyń «qara jáshigin» tekserýge kiristi.
Aqtaý mańynda qulaǵan ushaqtyń «qara jáshigi» Brazılııadan Qazaqstanǵa jetkizildi.