Aqtaý lıtseıiniń túlekteri merekelik keshten bas tartyp, qaıyrymdylyqqa qarajat bóldi
AQTAÝ. KAZINFORM – Aqtaýlyq mektep túlekteri merekelik keshtiń ornyna qaıyrymdylyqty tańdady.
Aqtaý qalasyndaǵy mamandandyrylǵan IT lıtseıiniń 11-synyp túlekteri bıylǵy attestat tapsyrý saltanatyn tek sán-saltanatpen emes, ıgi ispen este qaldyrdy. 97 bitirýshi sándi kıimder men merekelik atrıbýttarǵa jumsalatyn shyǵynnan sanaly túrde bas tartyp, jınalǵan qarajatty erekshe qajettilikteri bar balalarǵa kómek kórsetetin «Perishte» ortalyǵyna aýdardy.
Mańǵystaý oblysynyń qoǵamdyq kommýnıkatsııalar ortalyǵynyń málimetinshe «Seniń bes mınýtyń — bireýdiń búkil ómiri» atty qaıyrymdylyq aktsııasy oqýshylardyń bastamasymen qolǵa alynyp, ata-analar men ustazdar tarapynan tolyq qoldaý tapqan. Bul qadam — jas túlekterdiń azamattyq jaýapkershiligi men áleýmettik sezimtaldyǵynyń kórinisi.
— Jınalǵan qarajat aýtızm spektri buzylystary bar balalarǵa qoldaý kórsetetin qorǵa aýdaryldy. Bul qarajat balalardyń áleýmettik beıimdelýine kómektesetin arnaıy baǵdarlamalardy júzege asyrýǵa jumsalmaq. Bul — jaı ǵana bir rettik qaıyrymdylyq emes. Lıtseı túlekteri bul áreketti ózgelerge úlgi bolarlyq bastama, jańa chellendj retinde usynady. Olar árbir mektep bitirýshi qýanyshty sátin jaqsylyqpen bólisý arqyly qoǵamǵa oń ózgeris ákelýge yqpal ete alatynyna senimdi, — delingen habarlamada.
Aıta ketelik elde túlekter keshine qansha qarjy jumsalatyny týraly jazǵan edik.