Aqtaý kúre jolynda avtobýs órtendi

AQTAÝ. QazAqparat – 9 jeltoqsan kúni Aqtaý qalasy Prımorskıı aýdanynyń kúre jolynda «PAZ-320530» markaly avtobýs órtendi. Órtengen avtobýstyń ishinde balalar da bolǵan. Bul týraly kýágerler habarlady, dep jazady QazAqparat Lada.kz saıtyna silteme jasap.

Jol oqıǵasynyń kýágeri Rýslannyń aıtýynsha, keshe, 9 jeltoqsan kúngi saǵat 17:20 shamasynda ol jumystan shyǵyp, Prımorskıı aýdanyna jaqyn jerden ótken. Tútinge oranǵan avtobýsty kórgende, birden soǵan qaraı bet alǵan.

«Avtobýsqa júgirip kelgenimde, aldyńǵy jaǵyndaǵy kapottyń asty órtenip jatty. Salonda balalar bolǵan. Qansha ekenin naqty aıta almaımyn, artqy jaǵy balalarǵa toly edi. Olardy alyp shyǵýǵa syrttan jınalǵan adamdar kómektesti. Balalar qatty shoshyndy. Sońǵy balany alyp shyqqanymyzda, jalyn búkil avtobýsty alyp ketti», - dep baıandady ol.

«Kólik ishinde 30-ǵa jýyq bala bolǵan, olardy tez arada alyp shyǵyp, basqa avtobýsqa otyrǵyzdyq. Ata-analary dereý kelip jetti. Balalarynyń basqa avtobýsqa otyrǵyzylǵanyn bilmegen keıbireýleri úreılenip, jylap ta jiberdi», - dep baıandady taǵy bir kýáger.

Buǵan deıin Ortalyq kommýnıkatsııalar qyzmetinde órtengen avtobýstyń ishindegi jolaýshylar arasynda balalar bolǵany týraly aqpardy feık dep atady.

«WhatsApp messendjerinde 9 jeltoqsan kúni kúre jolda bolǵan órt oqıǵasynda avtobýstyń ishindegi jolaýshylar arasynda balalar bolǵany týraly aqparat taralýda. Aqtaý qalasynyń Tótenshe jaǵdaılar basqarmasy qaza bolǵandar men zardap shekkender týraly aqparatty teriske shyǵaryp otyr», - dep habarlady qoǵamdyq kommýnıkatsııalar ortalyǵynan.

Saıt redaktsııasy órtengen kóliktiń mektep avtobýsy bolǵan-bolmaǵany týraly aqparatty kútip otyr.

Keıinirek Aqtaý ákimdiginiń resmı paraqshasynyń astynda «feık» jazýy bar órtengen avtobýs túsirilgen vıdeo jarııalandy.