Aqtaý kóshesinde tóbelesken úsh áskerı qyzmetshiler sottaldy

AQTÓBE. KAZINFORM - Mańǵystaý oblysy Qaraqııa aýdanyndaǵy shekara basqarmasynyń úsh qyzmetkeri jazasyn bostandyqta júrip óteıdi. Olar tórt jyl boıy 100 saǵattan qoǵamdyq jumysqa tartylady.

Mańǵystaý oblysy Qaraqııa aýdanyndaǵy shekara basqarmasynyń júrgizýshisi, baılanys torabynyń júrgizýshi-elektrıgi, sharýashylyq qamtamasyz etý tobynyń júrgizýshisine Qylmystyq kodekstiń «Buzaqylyq» baby boıynsha aıyp taǵyldy. Іs materıalyna súıensek, kelisimshart boıynsha jumys istep júrgen sottalýshylar A.Mendeshev, B.Tokýlıev jáne A.Qadyr byltyr qarasha aıynda Aqtaý qalasyndaǵy dámhanalardyń birine barady. Dámhanadan tańǵa jýyq shyqqan olar esik aldynda turǵan úsh jábirlenýshimen sózge kelip qalady. Sottalýshy B. Tokýlıev olardyń birin balaǵattap, arada jaljal bastalady. Tóbeleske A.Mendeshev pen A. Qadyr da aralasyp, olar qolyna túsken tas, aǵashpen jábirlenýshilerdi ura bastaıdy. Jábirlenýshiler jeńil jaraqat alǵan.

Іs Aqtóbe oblystyq áskerı sotynda qysqartylǵan tártippen qaraldy. Sottalýshylar ózine taǵylǵan aıypty tolyq moıyndady. Jábirlenýshiler de keshirim berip, jeńil jaza taǵaıyndaýdy surady.

Sot úkimimen Á.Mendeshov, B. Tokýlıev jáne A. Qadyr Qylmystyq kodekstiń 293-babynyń 2-bóliginiń 1- tarmaǵynda kózdelgen qylmystyq quqyq buzýshylyqty jasaǵany úshin kináli dep tanylyp, 4 jylǵa bas bostandyǵynan shekteý jazasy taǵaıyndaldy. Sonymen birge jyl saıyn 100 saǵat májbúrli eńbekke tartylady.

Aıta keteıik, Aqtóbede kámeletke tolmaǵan qyzǵa seksýaldyq zorlyq kórsetken áskerı qyzmetshi sottaldy. Sot áskerı qyzmetshini aıypty dep tanyp, 15 jyl 6 aıǵa bas bostandyǵynan aıyrdy.