Aqtaý kóshesinde 8 jasar qyzdyń izinen ańdyp júrip tıisken erkek ustaldy

AQTAÝ. QazAqparat - Mańǵystaý oblysynyń ortalyǵynda kishkentaı qyzǵa tıisken er adam ustaldy, dep habarlaıdy QazAqparat.

Oqıǵanyń vıdeosy keshe birqatar aqparat quraldarynda taraǵan bolatyn.

Onda beımálim er adamnyń 8 jasar oqýshy qyzdyń sońynan ańdyp júrip, onyń denesin ustaǵany túsip qalǵan. Bul jaǵdaı 28 qyrkúıek keshki 17.30 shamasynda bolǵany aıtylady.

Polıtsııanyń málimetinshe, bul derek Aqtaý qalasy polıtsııa basqarmasynda Qylmystyq kodekstiń 124-baby 1-bóligi boıynsha tirkelgen.

Krımınaldyq polıtsııa qyzmetkerleri kúdikti adamdy anyqtap, ustady.

«Qazirgi ýaqytta sotqa deıingi tergeý amaldary júrip jatyr. Bul is boıynsha tolyq jáne obektıvti tekserý júrgizilip, sodan keıin quqyqtyq baǵa beriledi. Qylmystyq is tájirıbeli tergeýshige júktelgen», - dep málim etti Aqtaý qalalyq polıtsııa basqarmasy tergeý bóliminiń bastyǵy Maqsat Moldabaev.

Ózge aqparat tergeý múddesi úshin jarııalanbaıdy.