Aqtaý — Qazaqstandaǵy eń taza qala
AQTAÝ. KAZINFORM – «Qazaqstan Ǵarysh Sapary» ulttyq kompanııasy Qazaqstan Respýblıkasy ekologııa jáne tabıǵı resýrstar mınıstrligimen birlesip júrgizilip jatqan ǵaryshtyq monıtorıng derekterin jarııalady. Soǵan sáıkes, Aqtaý eń taza qala dep tanyldy.
Spýtnıkterdiń kómegimen jerdi jyl saıynǵy qashyqtyqtan zondtaý 1 naýryzdan 30 qyrkúıekke deıin júrgiziledi. Mamandardyń aıtýynsha, qaldyqtardy tek jyly kezde tabýǵa bolady. Óıtkeni jerde qar bolsa, sýretter baqylaýǵa jaramsyz bolyp qalady.
Birinshi jartyjyldyqta Qazaqstanda 600-den astam ruqsat etilmegen qoqys oryndary anyqtalǵan. Ǵaryshtyq monıtorıng derekterine súıensek, Aqtaý – eń taza qala. Sebebi shaharda tek 11 qoqys orny tabylǵan. Sondaı-aq qazirgi ýaqytta sol qoqystardy tazartý jumystary júrgizililip jatyr.
Ruqsat etilmegen qoqys polıgondarynyń kópshiligi Astana qalasynyń aýmaǵynan anyqtaldy. Onda 206 jerde qaldyqtar úıilgen. Odan keıin Ulytaý, Aqmola oblystarynda qoqys kóp.
