Aqtaý qalasyndaǵy mal soıatyn oryndarda karantın talaptary qatań saqtalǵan

AQTAÝ. QazAqparat - Aqtaýda Qurban aıt rásimin ótkizýge eki mal bazary jáne mal soıý pýnkti daıyndaldy,-dep habarlaıdy QazAqparat tilshisi.

Atap aıtsaq, birinshisi - 29 shaǵynaýdanynda ornalasqan «Elnar» mal bazary jáne mal soıý pýnkti. 2-shisi «Nur» mal bazary jáne mal soıý pýnkti, №2 óndiristik aı̆maq (Prıozernyı̆) «Maǵash nan» zaýytyna qarama-qarsy ornalasqan.

«Eki mal bazarynda da mal sany jetkilikti. Qazirgi kezde ákimdik, polıtsııa qyzmetkerleri men Aqtaý qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasynyń mamandary uı̆ymdastyrý jumystaryn júrgizýde. Jalpy, eki mal soıý pýnktinde de sanıtarlyq erejeler qatań saqtalǵan. Betperde kıip, 1,5-2 metr araqashyqtyqty saqtap, antıseptık qoldaný mindettelgen»,-dep habarlady Aqtaý qalasy ákiminiń baspasóz qyzmeti.