Aqtaý qalasyndaǵy №23 túzetý mekemesinen jappaı qarýly qashý týraly resmı aqparat
ASTANA. Maýsymnyń 23-i. QazAqparat - Búgin Aqtaý ýaqyty boıynsha tańǵy saǵat 5 kezinde QR ІІM Іshki áskerleriniń 6656 áskerı bóliminiń 1 atqyshtar rotasy kúzetetin Mańǵystaý oblysy boıynsha QAJB qatań tártiptegi №23 TM travmatıkalyq qarýdy qoldaný arqyly jáne sybaılastarynyń kómegimen bir top sottalǵan azamattyń jappaı qashýy oryn aldy, dep habarlaıdy QR ІІM Іshki áskerler komıtetiniń baspasóz qyzmeti.
Oqıǵanyń jaı-japsary:
Shamamen 04 saǵat 50 mınýtte sottalǵandardyń sybaılastary transformator qosalqy stantsııasyn isten shyǵaryp, úsh avtokólikpen kútip turdy. Osy ýaqytta TM-23 turǵyn jaı aýmaǵynan sottalǵandardyń bir toby negizgi qorshaýdan sekirip óte bastady.
Qashýǵa árekettenýdi boldyrmaý maqsatynda №6 beket kúzetshisi, merzimdi qyzmettegi qatardaǵy jaýynger E.Otarbaev jarǵyǵa sáıkes nysanaǵa tıgizý maqsatynda qarý qoldandy. Bul rette kúzetshige qatysty da qarý qoldanyldy. Nátıjesinde ol atys jaraqatyn aldy. Qazirgi ýaqytta oǵan operatsııa jasalyp, onyń densaýlyq jaǵdaıy turaqty qalypta. Áskerı qyzmetshi qarýdan atqan kezde, onyń ishinde jaraqat alǵannan keıin de atý barysynda úsh sottalǵanǵa oq tıip, olar qaza boldy. Qaraýyldyń jaraqattanǵanyn baıqaǵan qashqyndar sanaýly mınýtterda qorshaýdy artqa tastap, keıbiri jaıaý-jalpylap, keıbiri ózderin kútip turǵan kólikterge mine sala izderin jasyrmaq boldy.
Kúzetshilerdiń dabyl toby qylmyskerlerdiń artynan qýyp, oq atqan kezde bir sottalýshy jaralanyp, ózgeleri tún qarańǵylyǵyn paıdalanyp, Quryq aýylyndaǵy qurylysy aıaqtalmaǵan ǵımarat ishine baryp jasyryndy. Saǵat 06.00 (Aqtaý ýaqyty) kezinde iz kesýshi top pen 6656 áskerı bóliminiń qosymsha otrıady ǵımaratty qorshaýǵa aldy.
Tańǵy saǵat 08.50-de tutqyndaý toby ǵımaratqa basyp kirý kezinde bir qylmysker ustalyp, 2-ýi qaza taýyp, 1-i jaraqat aldy. Oqıǵa ornyn tintý kezinde 1 dana «Maýzer» tapanshasy, 1 «Saıga» myltyǵy, 1 jarylǵysh qalta men 1 pyshaq tabyldy. TM ishin tintý kezinde bul jerden 1 dana jarylǵysh zat salynǵan qalta men tyıym salynǵan aýmaqtan «Saıga» myltyǵy tabyldy.
Jalpy alǵanda, ishki áskerler kúzet tobynyń jedel qımylynyń arqasynda 8 sottalýshynyń qashý áreketine tosqaýyl qoıyldy. Jedel aqparat boıynsha, 13 qylmysker kútip turǵan kólikterge minip, izderin jasyryp úlgerdi. Qazirgi ýaqytta jedel-izdestirý sharalary júrgizilýde.
Sóıtip, kúzetshi áskerı qyzmetshiniń tyńǵylyqtylyǵy men kásibı sheberliginiń arqasynda sottalǵandardyń jappaı qashý áreketine jartylaı tosqaýyl jasalyp, qashyp ketken ózge qylmyskerlerdi izdestirýge jaǵdaı jasalyp otyr.
Qazirgi kúni kúzetshi aýrýhanaǵa jatqyzyldy, onyń densaýlyǵyna esh qaýip tónip turǵan joq.
