Aqtaý qalasyn sapaly kógaldandyrýdyń tıimdi tásili tabyldy

NUR-SULTAN. QazAqparat – Aqtaý qalasyn kógaldandyrý aldaǵy 5 jyl qatarynan memlekettik-jekemenshik áriptestik jobasy aıasynda júrgiziledi. Tapsyrys berýshini jyl saıyn anyqtaý sapaǵa keri áser etetin bolǵasyn osyndaı sheshim qabyldanǵan, dep habarlaıdy QazAqparat qalanyń turǵyn úı-kommýnaldyq sharýashylyǵy bólimine silteme jasap.

«Bes jylǵa baǵyttalǵan joba aıasynda 20 905 japyraqty jáne 11 750 qylqan japyraqty aǵash, 1 460 sándik buta, 20 000 m buta, 5 000 sharshy metr kógal, 652 500 gúlzar, 18 000 raýshan gúlin egý josparlanyp otyr», - deıdi Aqtaý qalalyq turǵyn úı-kommýnaldyq sharýashylyǵy bólimi basshysynyń m.a. Anýar Týlıakov.

Memlekettik-jekemenshik áriptestik aıasynda jumys isteıtin mekeme («GreenCityAktau» JShS) anyqtalǵanǵa deıin «Aqbota» MKK-niń kógaldandyrýshylary jasyl jelekke kútim jasap, jańa aǵash kóshetterin otyrǵyzǵan. Olar aqpan aıynan bastap 4 650 túp aǵash ekti, onyń 2 650-i qylqan japyraqty (qaraǵaı, bıota) 2 000 danasy japyraqty aǵashtar (aılant, klen, ıasen, kılıterııa).

«Sonymen qatar, qalanyń 9, 11 jáne 14-shaǵynaýdandaryn biriktiretin aınalma joldyń ortasyna 112 000 dana 1 jyldyq petýnıa gúli, 12-shaǵyn aýdandaǵy Tobanııaz eskertkishiniń aldyna raýshan gúlderi egildi. Otyrǵyzylǵan kóshetterdiń barlyǵy Aqtaý qalasynda ósirilgen, ıaǵnı barlyǵy da Mańǵystaý oblysynyń qurǵaq klımatyna tózimdi», - dedi Anýar Týlıakov.

Al, jasyl jelekti sýarý bıyl Aqtaýda alǵash ret sý qubyry arqyly júrgizile bastady. Jyldar boıy teńizge ketip jatqan jerasty tuşy sýlaryn tıimdi paıdalaný úshin qalanyń ortalyq bólikterine, saıabaqtar men alańdarǵa 55 shaqyrym qubyr tartyldy. Qazir onyń 45 shaqyrymy iske qosylǵan. Qalǵan 10 shaqyrymy jóndeýden ótip jatyr. Maýsym aıynyń sońyna deıin tolyqtaı qoldanysqa berilmek.

Sondaı-aq, «GreenCityAktau» seriktestigi jyl sońyna deıin taǵy 40 shaqyrym sý qubyryn iske qosýdy qolǵa aldy. Qazirdiń ózinde bastapqy 13 shaqyrymy 6 shaǵyn aýdanda júrgizildi.

«Shaǵynaýdan ishindegi jasyl jelekti sýarý úshin qazirgi tańda múlik ıeleriniń birlestigi jáne turǵyn úılerge qyzmet kórsetýshi mekemelermen kelissózder júrgizilip, kelisimshartqa otyrý jumysyn bastadyq. Qosymsha 30 arnaıy sý tasýshy kólik qalanyń jasyl jelegin sýarýǵa tartyldy. Biri jer astynda, ekinshisi jer ústinde ornalasqan 60 tekshemetrlik qos rezervýar bar», - dedi Anýar Týlıakov.

Sondaı-aq, qazir taldardy ýlaý (dezınfektsııa) jumystary da júrgizilip jatyr. «BI-58» jáne «Karate» dep atalatyn ý túrlerimen 40 myńǵa jýyq jasyl jelek zalalsyzdandyryldy.