Aqtaý qalasy keleshekte Qazaqstannyń Antalııasyna aınalady - Elbasy

AQTAÝ. QazAqparat - Qazaqstan Prezıdenti jaǵajaıy, basseındi akvaparki jáne qonaq úı kesheni bar «Tree of life» demalys ornynyń jumysymen tanysty, dep habarlaıdy QazAqparat Aqordaǵa silteme jasap.

Nursultan Nazarbaev týrıstermen áńgimelesý barysynda Kaspıı shıpajaılarynda demalýdyń artyqshylyqtaryn, sonyń ishinde baǵanyń qoljetimdiligin, sýǵa shomylý maýsymynyń uzaqtyǵyn, Aqtaý qalasy ınfraqurylymynyń jaqyndyǵyn, qonaq úı sanynyń kóptigin atap ótti.

«Men buǵan deıin Alakólde, Balqashta, Býrabaıda boldym. Bul demalys aımaǵy otandyq týrızmdi damytý úshin jańa múmkindikter beredi. Biz osy salany ilgeriletýdi josparlap otyrmyz. Aqtaý qalasy keleshekte Qazaqstannyń Antalııasyna aınalady», - dedi Memleket basshysy.

Bir maýsymda 140 myńǵa jýyq adamdy qabyldaýǵa múmkindigi bar demalys aımaǵy 5,7 gektardy qamtıdy jáne Aqtaý qalasynan 25 shaqyrym jerde ornalasqan. Týrıstik nysanǵa tartylǵan ınvestıtsııanyń jalpy kólemi - 485,2 mıllıon teńge.