Aqtaý qalasynyń jylý jelilerin rekonstrýktsııalaýǵa Úkimet rezervinen 3,6 mlrd teńge bólindi
ASTANA. KAZINFORM — Mańǵystaý oblysy Aqtaý qalasyndaǵy 9,2 shaqyrym magıstraldyq jylý jelilerin rekonstrýktsııalaý jumystaryn aıaqtaýǵa Úkimet rezervinen shamamen 3,6 mlrd teńge bólindi. Premer-mınıstr Oljas Bektenov tıisti qaýlyǵa qol qoıdy. Bul týraly Úkimet málim etti.
Jalpy quny 13,8 mlrd teńge bolatyn bul jobany iske asyrý 2024 jyly bastaldy.
Búginde joba aıasynda eki qubyrly júıemen 5,5 shaqyrym jylý jelisi tartyldy. Eski bolat qubyrlar bólshektelip, olardyń ornyna 530 mm-den 1020 mm-ge deıingi dıametrli kóbikti polıýretan oqshaýlaǵyshpen jabdyqtalǵan zamanaýı qubyrlar ornatylyp jatyr. Sondaı-aq 2024-2025 jylǵy jylytý maýsymynda anyqtalǵan 375 aqaý tolyǵymen jóndeldi.
— Aqtaý qalasynyń jylý jelileriniń jalpy uzyndyǵy 562 shaqyrym. Tozý deńgeıi — 79%. Atalǵan joba iske asyrylǵannan keıin jelilerdiń tozý deńgeıi 75%-ǵa deıin qysqarady. Bul turǵyndardy jylytý maýsymynda úzdiksiz jylýmen qamtamasyz etýge, ystyq sý jetkizý ótkizý qabiletin arttyrýǵa jáne paıdalaný shyǵyndaryn azaıtýǵa múmkindik beredi, — delingen habarlamada.
Aldaǵy ýaqytta «Energetıka jáne kommýnaldyq sektordy jańǵyrtý» ulttyq jobasyn júzege asyrý aıasynda 2025-2029 jyldarǵa arnalǵan qarjylandyrý kólemin aıqyndaı otyryp, 2029 jylǵa deıin 175 shaqyrym jylý jelileri men jylýmen jabdyqtaý kózderin rekonstrýktsııalaý jáne salý josparlanyp otyr. Joba jelilerdiń tozýyn azaıtýǵa jáne ınvestıtsııa tartý arqyly kommýnaldyq qyzmetterdiń sapasyn arttyrýǵa baǵyttalǵan.
Buǵan deıin habarlanǵandaı, Stepnogorskiniń jylý jelilerin rekonstrýktsııalaýǵa 2,7 mlrd teńge bólingen bolatyn.