Aqtaý qalasynyń prokýroryna aıyppul salyndy

AQTAÝ. KAZINFORM – Apellıatsııa birinshi satydaǵy sottyń usaq buzaqylyq isi boıynsha qaýlysynyń kúshin joıdy.

Mańǵystaý oblystyq sotynyń qylmystyq ister jónindegi sot alqasy Erbolat Ábdirovke qatysty Aqtaý qalasynyń Ákimshilik quqyq buzýshylyqtar jónindegi mamandandyrylǵan sotynyń qaýlysyn apellıatsııalyq tártippen qaıta qaraǵan.

Sot alqasy birinshi satydaǵy sottyń Ábdirovtiń kinásizdigi týraly tujyrymdary negizsiz ekenin anyqtady. Apellıatsııalyq qaraý barysynda 2025 jyldyń 27 tamyzynda saǵat 23:00-de ol Almaty–Astana baǵyty boıynsha KS-955 reısine jolaýshylardy tasymaldaǵan avtobýsta adamdarǵa qorlap tıiskeni, qoǵamdyq tártipti buzǵany rastalǵan.

Onyń kinási ákimshilik quqyq buzýshylyq týraly hattamamen, kýágerlerdiń aıǵaqtarymen, polıtsııa qyzmetkerleriniń aktileri jáne baıanattarymen dáleldendi.

- Qaraý nátıjesinde alqa Á.-niń ÁQBtK-niń 434-baby 1-bóligimen kózdelgen usaq buzaqylyq jasaǵanyn anyqtady. Osyǵan baılanysty, birinshi satydaǵy sot qaýlysy zańsyz ári negizsiz dep tanylyp, joıyldy, óıtkeni sot istiń dáleldemelerin tolyq kólemde zerttemegen jáne tıisti quqyqtyq baǵa bermegen. Nátıjesinde Á. ákimshilik quqyq buzýshylyq jasaǵany úshin kináli dep tanylyp, oǵan 78 640 teńge mólsherinde aıyppul túrinde ákimshilik jaza taǵaıyndaldy. Sot qaýlysy zańdy kúshine endi, - delingen habarlamada.

Buǵan deıin, mas kúıinde tártip buzdy dep aıyptalǵan prokýror aqtalyp shyqqan bolatyn.

Odan keıin, Aqtaý prokýrory qyzmetinen ýaqytsha shettetildi.