Aqtaý qalasynyń ákimi: mamandar magıstraldyq qubyrdaǵy aqaýdy jóndep jatyr

Aqtaýda birneshe shaǵyn aýdandy jylýmen qamtıtyn magıstraldyq jylý qubyrynda apattyq jaǵdaı bolyp, jylý berý ýaqytsha shektelgen edi. Qazir apattyq orynda «Kaspıı jylý, sý arnasy» MKK mamandary jóndeý jumystaryn júrgizip jatyr, dep habarlaıdy Kazinform.

Oqıǵa bolǵan jerge Mańǵystaý oblysynyń ákimi Nurlan Noǵaev ta baryp kommýnaldyq mekeme basshylarymen jáne ýákiletti organ ókilderimen jedel jınalys ótkizdi. Aqtaý qalasynyń ákimi Ulyqbek Tnalıev jaǵdaıdy baqylaýda ustap otyrǵanyn aıtty. 

«Qurmetti turǵyndar aqaý bolǵan jer anyqtalyp, eki jaqtan ysyrmalar(zadvıjka) jabylyp, qysymy azaıtyldy. Qazir jóndeý jumystary júrgizilip jatyr. Sonymen qatar oblys ákimi Nurlan Asqaruly Noǵaev osy jerge ózi kelip, kommýnaldyq qyzmetkerlermen jınalys ótkizip, tapsyrmasyn berdi. Atalǵan jınalysta osy aqaýdy retteý máselesimen qatar, bolashaqta da qandaı jumystardy isteıtinimizdi, ıaǵnı, tez arada shuǵyl qolǵa alatyn sharalardy talqyladyq. Barlyq tehnıka jumyldyryldy. Qazir qubyrlardy alyp kelip, osy jerde aýystyrý máselesin qarap, arnaıy jospar bekitildi», - dedi qala ákimi Ulyqbek Tnalıev.