Aqtaý ákimi balanyń ómirin saqtap qalǵan polıtsııa qyzmetkerlerin marapattady
AQTAÝ. KAZINFORM — 6 tamyzda Aqtaý qalasynyń ákimi Ábilqaıyr Baıpaqov qyzmettik mindetin úlgili atqaryp, balanyń ómirin saqtap qalǵan polıtsııa qyzmetkerlerine qurmet kórsetti.
Eske salsaq, 30 shilde kúni «102» arnasyna Aqtaý qalasyndaǵy turǵyn úı keshenderiniń birinde 10-qabattaǵy ashyq terezeniń syrtqy jaqtaýynda turǵan balanyń ómirine qaýip tónip turǵany týraly habarlama kelip túsken.
Oqıǵa ornyna jedel jetken Aqtaý qalasy Polıtsııa basqarmasy Patrýldik polıtsııa batalonynyń qyzmetkerleri — polıtsııa leıtenanty Danııar Tatıev pen polıtsııa kapıtany Erjan Kokenov kásibı ári úılesimdi áreket etip, ǵımarattyń syrtqy jaqtaýynda turǵan balany aman-esen qutqaryp qaldy.Polıtseılerdiń jedeldigi men batyl áreketiniń arqasynda qaıǵyly jaǵdaıdyń aldyn alý múmkin boldy.
Qabyldaý barysynda qala ákimi Ábilqaıyr Baıpaqov qoǵamdyq qaýipsizdikti qamtamasyz etý jolynda aıanbaı eńbek etip júrgen tártip saqshylarynyń kásibıligi men janqııarlyǵyna joǵary baǵa berip, olardyń erligi úshin rızashylyǵyn bildirdi.
— Adam ómirinen asqan qundylyq joq. Qıyn sátte batyldyq tanytyp, óz mindetterińizdi abyroımen atqardyńyzdar. Sizderdiń jedel ári kásibı áreketterińizdiń arqasynda bir balanyń ómiri saqtalyp qaldy. Bul — naǵyz azamattyq jaýapkershilik pen antqa adal qyzmet etýdiń aıqyn kórinisi. Osyndaı eńbekterińiz úshin shynaıy alǵysymdy bildiremin jáne aldaǵy qyzmetterińizge tabys tileımin, — dedi qala ákimi.
Jıyn sońynda qala ákimi Ábilqaıyr Baıpaqov pen Aqtaý qalalyq máslıhatynyń tóraǵasy Sembiǵalı Zákenov polıtsııa qyzmetkerlerine Qurmet gramotasy men estelik syılyq tabystady.
Aıta ketelik Oralda dúken tonaǵan qylmyskerdi der kezinde ustaǵan polıtseıler marapattalǵan edi.
