Aqtaý qalasyndaǵy ushaq apaty: oqıǵa ornynan vıdeo jarııalandy

ASTANA. KAZINFORM – Búgin jergilikti ýaqyt boıynsha saǵat 11:00-de Mańǵystaý oblysynyń Tótenshe jaǵdaılar departamentine Baký – Groznyı baǵytynda ushyp bara jatqan Azerbaijan Airlines áýekompanııasynyń Embraer 190ar áýe kemesi apatty jaǵdaı jarııalap,  Aqtaý áýejaıyna qonýǵa jaǵdaı jasaý  týraly aqparat tústi. Qoný  ýaqyty shamamen saǵat 11:25 dep belgilendi.

Aldyn ala aqparat boıynsha bortta 69 adam, onyń ishinde 5 ekıpaj bolǵan.

Mańǵystaý oblysy TJD kúshteri men quraldary dereý oqıǵa ornyna jiberildi.

Saǵat 11: 30-da áýejaıdan 3 kılometr jerde ushaqtyń apatqa ushyraǵany týraly aqparat tústi. Osyǵan baılanysty joǵary rang boıynsha TJD kúshteri men quraldary qosymsha jiberildi.

TJM Komandalyq ortalyǵynyń bazasynda respýblıkalyq shtab quryldy, onyń quramyna Іshki ister, Densaýlyq saqtaý, Kólik mınıstrlikteriniń, Ulttyq ulannyń, Syrtqy ister mınıstrliginiń jáne basqa da vedomstvolardyń ókilderi kirdi.

Jalpy operatsııaǵa azamattyq qorǵaý qyzmetiniń jeke quramynan 701 adam jáne 82 birlik tehnıka jumyldyryldy.

Saǵat 11:45-tegi jaǵdaı boıynsha órt oqshaýlanyp, 12:05-te sóndirildi. Saǵat 14:10-da 29 adam, onyń ishinde 2 bala medıtsınalyq mekemelerge jetkizildi. Qazirgi ýaqytta avarııalyq-qutqarý jumystary jalǵasyp jatyr.

Medıtsınalyq kómek kórsetý úshin Astana qalasynan sanıtarlyq avıatsııa borty Aqtaýǵa jiberildi.

Sonymen qatar oqıǵa ornynda úkimettik komıssııanyń is-qımylyn úılestirý úshin TJ mınıstr general-maıor Shyńǵys Árinov, TJ vıtse-mınıstri Kegen Tursynbaev jáne TJ joıý departamentiniń bastyǵy Aqtaýǵa ketti.

Oqıǵa týraly ózekti aqparatty alý úshin jedel jeli telefondary jumys isteıdi:

Astana qalasynyń komandalyq ortalyǵynda: 8-7172-55-96-21, 55-96-83.

Mańǵystaý oblysy TJD: 8-7292-31-90-91.

Osy saǵatta jedel jeli telefondaryna 272 qońyraý tústi.

Qutqarý jáne qalpyna keltirý jumystaryn júrgizý barysy boıynsha aqparat odan ári jańartylatyn bolady.

Aqtaýdaǵy ushaq apaty týraly jazǵan bolatynbyz.