Aqtaý qalasyndaǵy avtojoldarǵa jańa jolaqtar qosyldy
AQTAÝ. KAZINFORM — Aqtaý qalasynyń 12 kóshesinde avtojoldarǵa ońǵa burylý jolaǵy qosymsha salyndy.
- Qalada kólik keptelisiniń aldyn alý maqsatynda ótken jyly 7 jerde kedergisiz ońǵa burylý jolaqtary uıymdastyrylǵan bolatyn. Bıyl bul baǵyttaǵy jumystar jalǵasyp, taǵy 4 avtomobıl joly qıylysyna 5 qosymsha ońǵa burylý jolaǵyn salyndy, - dedi qala ákimi Ábilqaıyr Baıpaqov turǵyndarmen eseptik kezdesýinde.
Sondaı-aq 9 772 sharshy metr avtomobıl joldaryndaǵy jolaqtar sýyq plastıkpen jáne 1500 sharshy metr jol tańbasy termoplastıkpen jańartylyp, 18 719 m2 shuńqyrly jol jóndeý jumystary júrgizildi. 16 qıylysqa baǵdarsham ornatylyp, olar kezeń-kezeńimen qosylyp jatyr. Qoǵamdyq kólik ınfraqurylymyn jaqsartý jáne turǵyndarǵa jaıly orta qalyptastyrý maqsatynda 100 aıaldama ornatylǵan.
- Jańadan ornatylǵan aıaldamalar jaryqtandyrý júıesi jáne qoqys jáshikterimen qamtylǵan. Sonymen qatar Aqtaý qalasynda qoǵamdyq kólik ınfraqurylymyn jańartý jumystary aıasynda bıyl avtobýs parki 100%-ǵa jańartyldy, - dedi ákim.
Buǵan deıin habarlaǵanymyzdaı, Mańǵystaý atom energetıkalyq kombınatynyń kanaly arqyly jetkiziletin sý mólsheriniń azaıýyna baılanysty 2026 jyly Kaspıı teńizin tereńdetý jumystary bastalmaq.