Aqtaýda árqaısysy 1 200 oryndyq 2 mektep ashyldy
AQTAÝ. KAZINFORM – Búgin, 30 qyrkúıek kúni Aqtaý qalasynyń 18 shaǵyn aýdanynda №18-mektep jáne 19 A shaǵyn aýdanynda №24-mektep paıdalanýǵa berildi. Bilim oshaqtary Memleket Basshysynyń tapsyrmasy boıynsha «Bilim berý ınfraqurylymyn damytý» qorynyń esebinen salynyp, qoldanysqa engizildi.
Mektepterde balalardy oqytý úshin barlyq jaǵdaı jasalǵan.
— Mektep ǵımarattary tolyqtaı zamanaýı úlgide salynyp, qajetti kerek-jaraqtarmen qamtamasyz etilgen. Munda sport zaldary, ashana, kitaphana, kompıýter synyptary, zerthana kabınetteri men sheberhana, medpýnkt jáne egý kabıneti jumys isteıdi, — deıdi Mańǵystaý oblystyq bilim basqarmasynyń basshysy Dınara Jumasheva.
Mańǵystaýda oqýshy sany jyl saıyn orta eseppen 5 myńǵa ósip otyr. Jańa oqý jylynda oblys mektepterinde 183 myńnan asa oqýshy oqýda, onyń ishinde 20 myń búldirshin mektep tabaldyryǵyn alǵash ret attady.
Oblysta «Bilim berý ınfraqurylymyn damytý» qorynyń esebinen taǵy eki mektep boı kóterdi. Olar Munaıly aýdanynyń Basqudyq jáne Qyzyltóbe-2 aýyldarynda ornalasqan. Odan bólek, aımaqta «Jaıly mektep» jobasy aıasynda 21 mektep qoldanysqa berilmek.
Buǵan deıin, Aqtaýda oqýshylardyń mekteptiń kireberisinde taptalyp qala jazdaǵanyn jazǵan edik.
