Aqtaý qalasynan Beıneýge baǵyt alǵan avtobýs apatqa ushyrap, 4 adam mert boldy

AQTAÝ. KAZINFORM — 16 qańtar kúni shamamen saǵat 01:03-te KZ-11 «Dossor – Qulsary – Beıneý – Saıótes – Shetpe – Jetibaı – Aqtaý» avtomobıl jolynyń 383-shi shaqyrymynda Yutong markaly jolaýshylar avtobýsy jol apatyna ushyrady. Bul týraly Kólik mınıstrligi málim etti.

Vedomstvonyń málimetinshe, avtobýs 2025 jyldyń 19 jeltoqsanynda tehnıkalyq baıqaýdan ótken jáne «CASPIAN TRANS CORPORATION» LLC kompanııasynda tirkelgen. 

Aldyn ala málimet boıynsha, Aqtaý qalasynan Beıneý aýyly baǵytynda kele jatqan avtokólik júrgizýshisi rýldi basqara almaı, kólik aýdarylyp ketken. Jol-kólik oqıǵasy saldarynan oqıǵa ornynda tórt jolaýshy qaza taýyp, úsh adam ártúrli dárejedegi jaraqat alyp, medıtsınalyq mekemelerge jetkizildi.

— Avtobýsta barlyǵy 50 adam bolǵan. Atalǵan avtojol ýchaskesi tehnıkalyq II sanatqa jatady. Jol jamylǵysy asfaltbetondy, joldyń eni 9 metrdi quraıdy, jol jamylǵysynda aqaýlar anyqtalǵan joq. Jol belgileri bekitilgen dıslokatsııaǵa sáıkes tolyq kólemde ornatylǵan. Oqıǵa táýliktiń qarańǵy ýaqytynda oryn alǵan. Jol-kólik oqıǵasy kezinde kólik quralyn 1985 jyly týǵan júrgizýshi basqarǵan, — delingen habarlamada.

Mınıstrliktiń dereginshe, jol-kólik oqıǵasy bolǵan jerden shamamen 200 km buryn ekinshi júrgizýshi rólge aýysyp otyrǵan. Atalǵan jol-kólik oqıǵasy faktisi boıynsha Mańǵystaý oblysy Polıtsııa departamenti barlyq mán-jaılardy anyqtaýǵa baǵyttalǵan qajetti tergeý sharalaryn júrgizip jatyr.

Buǵan deıin Oral qalasynda 4 avtokólik soqtyǵysyp, 5 adam aýrýhanaǵa jetkizilgen edi.