Aqtaý halyqaralyq teńiz saýda aılaǵyn odan ári damytý máselesiniń jańa joldary anyqtaldy
ASTANA. 29 sáýir. QazAqparat - 27 sáýirde Kólik jáne kommýnıkatsııa mınıstri Berik Kamalıev «Aqtaý halyqaralyq teńiz saýda porty» RMK-ny odan ári damytý máselesi boıynsha otyrys ótkizdi,
dep habarlady atalmysh vedomostvonyń baspasóz qyzmeti.
Otyrys barysynda «Aqtaý halyqaralyq teńiz saýda porty» RMK dırektory Berik Ýandyqovtyń aqparaty tyńdaldy. Teńiz portynyń basshysy B. Ýandyqov óz baıandamasynda aılaqtyń qazirgi jaǵdaıy men aldaǵy ýaqyttaǵy damý perspektıvasyn, sondaı-aq kásiporynnyń 2010 jylǵy jáne aǵymdaǵy jylǵy І toqsanyndaǵy óndiristik kórsetkishterin atap ótti. 2010 jylǵy nátıjelerdi kásiporynnyń bekitilgen kórsetkishteri tabysty oryndalǵany 12,9 mln. tonna júk tasymaldanyp, jospardan 6,8% artýy kórsetkishterinen ańǵarylady. Júktiń barlyq túrleri boıynsha josparlanǵan kórsetkishter tolyǵymen oryndaldy. Sonyń ishinde, 9,5 mln.tonna munaı, 1 mln. 963 myń tonna bolat, 310 myń tonna basqa da júkter, 406 myń tonna astyq jáne 603 myń tonna paromdyq júk tasymaldandy. 2011 jylǵy І toqsannyń qorytyndysy boıynsha 2,8 mln.tonnadan asa júk tasymaldandy, ıaǵnı, bekitilgen kórsetkishterdiń 104,7% qurady, sonyń ishinde, munaı men bolatty tasý kólemderi josparlanǵan deńgeıde júrgizilýde, ıaǵnı 2,1 mln.tonna munaı jáne 385 myń.tonna bolat tasymaldandy.
«Aqtaý halyqaralyq teńiz saýda porty» RMK 2010 jyl boıy belsendi marketıng jasaý saıasatyn júrgizip otyrdy. Júktiń qazirgi túrlerin saqtap, jańa túrlerin tartý boıynsha jáne tranzıtti damytý boıynsha jumystar jalǵastyryldy. Paromdy tasymaldaýdy jandandyrý sheńberinde júkterdiń kólemi artyp, nomenklatýrasy keńeıtildi.
Sońǵy bes jylda Aqtaý portyn sol jaq baǵytta keńeıtý jobasy iske asyrylýda. Osyǵan oraı, qorǵanystyq gıdrotehnıkalyq qurylǵylaryn (mol qurylǵysy jáne tolqyn toıtarǵysh) salýmen qosa teńiz túbin tereńdetý jumystaryn júrgizý arqyly negizgi ınfraqurylym jasalýda. 2011 jylǵy birinshi jarty jyldyq kezeńinde «Volnolom» nysanyn aıaqtaý josparlanýda. Jańa aılaqtar jylyna 2 mln. tonna qurǵaq júkti suryptaýdan ótkizýge jáne óńirlik jobalardy qoldaýǵa yqpal etip, eksporttyq-ımporttyq tasymaldaýlardyń odan ári damýyna múmkindik ashatyn bolady. Sonymen qatar, 2011-2013 jyldarǵa arnalǵan Óndiristik tıimdilikti arttyrý baǵdarlamasy daıyndaldy.
Otyrystyń qorytyndysy boıynsha, mınıstr B. Kamalıev «Aqtaý halyqaralyq teńiz saýda porty» RMK basshylyǵyna «Aqtaý portyn sol jaq baǵytta keńeıtý» jobasy sheńberinde qarjylandyrýdy odan ári jalǵastyrý jóninde usynystar engizýdi, teńiz túbin tereńdetý jumystaryn júrgize berýdi tapsyrdy. Sondaı-aq porttyń logıstıkasyn damytý tujyrmdamasyn «Horgos» halyqaralyq shekaralyq yntymaqtastyq ortalyǵymen baılanysa otyryp ázirleý jóninde usynystar berýdi tapsyrdy. Sonymen qatar, kásiporynǵa keıbir júkterdiń tasymaldanýy tómendeýine baılanysty júkterdi dıversıfıkatsııalaý boıynsha qajetti sharalardy qabyldaý tapsyryldy. Al kólik jáne qatynas joldary komıtetine porttyń teńiz ákimshiligin qurý máselesi boıynsha normatıvtik quqyqtyq aktilerdi daıyndaý mindetteldi.
