Aqtaý halyqaralyq áýejaıy maýsymnan bastap Ashyq jobasyna qosylady

AQTAÝ. QazAqparat - 7 maýsymnan bastap Aqtaý halyqaralyq áýejaıy jobaǵa resmı túrde qosylady, dep habarlaıdy QazAqparat tilshisi.

Búginde osy joba aıasynda Mańǵystaý oblysynda 286 kásiporyn jumys istep tur. Onyń ishinde 258 nysan resmı túrde jobaǵa endi, al 28 nysan test rejıminde qyzmet atqaryp jatyr.

Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblysy kásipkerlik jáne saýda basqarmasynyń basshysy Janna Toqbaeva málim etti.

Onyń aıtýynsha, 28 mamyr kúni jobaǵa taǵy 10 kásipkerlik nysan qosylady.

Baspasóz konferentsııasyna Mańǵystaý oblysy Kásipkerler Palatasy dırektorynyń orynbasary Aqqý Aıtjan da qatysty.

Onyń málimetinshe, Mańǵystaý oblysynda Ashyq jobasyna Qazaqstan Respýblıkasy Ulttyq Ulanynyń 5548, 3502 jáne 6656 áskerı bólimderi tirkeldi.

«Budan bólek Ashyq jobasy boıynsha kelesi mekemeler jumys isteıdi: «Kaskor-Mashzavod» AQ, Abaı atyndaǵy mádenı-saýyq kesheni, Mańǵystaý ındýstrııalyq parki, Sh. Esenov atyndaǵy Kaspıı tehnologııalar jáne ınjınırıng ýnıversıteti, «Otpan» MKQK, Mańǵystaý oblysynyń qýyrshaq teatry, Ǵylymı-ádistemelik jáne mádenı-demalys qyzmeti ortalyǵy, «Kaspıı» kásibı fýtbol klýby, Mańǵystaý óner kolledji jáne Mańǵystaý týrızm kolledji. 22 mamyrdaǵy №22 qaýlyǵa sáıkes, Ashyq jobasy boıynsha loto klýbtardyń qyzmetine de ruqsat etildi», - dedi Aqqý Aıtjan.