Aqtaý halqynyń MAEK-Qazatomónerkásipke 606 mln teńge qaryzy bar

AQTAÝ. QazAqparat – Aqtaý qalasy turǵyndarynyń «MAEK-Qazatomónerkásip» JShS-ǵa jalpy bereshegi 606 mln 028 myń teńgeni qurady. Bul týraly Aqtaý qalasy ákimdiginiń baspasóz qyzmeti málim etti, dep habarlaıdy QazAqparat tilshisi.

Aqtaý qalasynyń turǵyndary ózderi paıdalanǵan jylý men sýdyń aqshasyn keshiktirip, tólemeı kelgen. Jalpy soma 600 mln teńgeden asyp ketken.

«Aqtaý qalasynyń sý jáne jylýmen jabdyqtaý qyzmetterine bereshegi bar turǵyndarynan qysqa merzimde qaryzdy óteý suralady» delingen ákimdik habarlamasynda.

Aıta keteıik, 2022 jyldyń qarasha aıynyń basynda Mańǵystaý oblysy jurtshylyǵymen kezdesýde Prezıdent Qasym-Jomart Toqaev «MAEK-Qazatomónerkásip» qýatyn keńeıtýge erekshe nazar aýdarý kerektigin aıtqan edi.

«Óńirdiń qarqyndy damýy men halyq ósiminiń joǵary qarqyny ınjenerlik jelilerdi jańǵyrtý máselesin ótkir qoıyp otyr. Kommýnaldyq ınfraqurylym júktemelerge tótep bere almaıdy. Óńirdegi sý, jylý jáne elektr energııasynyń negizgi jetkizýshisi «MAEK-Qazatomónerkásip» bolyp tabylady.

Sonymen qatar, bul kásiporyndaǵy jabdyqtyń tozýy 80%-dan asady. Oblysqa burynǵy jumys saparym barysynda men kásiporyndy jańǵyrtý baǵdarlamasyn ázirleýdi tapsyrdym. Úkimet ony iske asyrýǵa qajetti qarajatty taýyp, jýyq arada jumysqa kirisýi kerek», - dedi Prezıdent.