Aqtaý garnızonynyń myńnan astam teńiz jaıaý áskeri jaýyngerlik atystarǵa qatysyp jatyr
ASTANA. KAZINFORM - Bólimshelerdiń jaýyngerlik atys daıyndyǵy taktıkalyq daıyndyqty oqytýdyń eń joǵary túrine jatady, ári bólimshelerdi jaýyngerlik úılestirý men atys jattyǵýlarynyń sońǵy kezeńi, dep habarlaıdy QR Qorǵanys mınıstrliginiń baspasóz qyzmeti.
Áskerı qyzmetshiler buǵan deıin qysqy oqý kezeńindegi mamandyq boıynsha daıyndyq barysynda shtattyq qarý-jaraq pen áskerı tehnıkanyń taktıkalyq-tehnıkalyq sıpattamalaryn zerdelep, saptyq jáne atys daıyndyǵynan derbes túrde ótken bolatyn.
– Áskerı qyzmetshiler «Oımasha» polıgonynda qazirgi zamanǵy jalpy áskerı urysty júrgizý, qorǵanys kezinde, shabýyldaý men jergilikti jerdi barlaý barysynda is-qımyl jasaý daǵdylaryn pysyqtap jatyr. Sabaqtyń úshten biri túngi jaǵdaıda ótýde, – dep túsindirdi shabýyldaý batalonynyń komandıri maıor Farhat Manabaev.
Bólimshelerdiń úılesimdiligi taktıkalyq tapsyrmalardy oryndaý kezinde tekseriledi. Komandırler atysty basqarý men bólimsherlerdiń urys qımyldarynan tájirıbe alsa, áskerı qyzmetshiler bólimshe quramyndaǵy is-qımyl tártibin bekitedi.
– Jaýyngerlik atystardy oryndaý kezinde bólimshe komandıriniń is-qımyly onyń bólimsheni shapshań, durys jáne naqty basqarý qabiletine qaraı baǵalanady, – dep naqtylady batalon komandıri.
Jaýyngerlik daıyndyq is-sharalaryna 50-ge jýyq áskerı tehnıka jumyldyrylǵan. Jaýyngerlik daıyndyqtyń kelesi kezeńi vzvodtardy úılestirý bolmaq.
