Aqtaý garnızonynyń 200-den asa sarbazy Jaýyngerlik týmen qoshtasty
ASTANA. KAZINFORM – QR Qarýly kúshteri Áýe qorǵanysy kúshteriniń áýe shabýylyna qarsy qorǵanys brıgadasynda Jaýyngerlik týmen qoshtasý rásimi saltanatty túrde ótti.
Merzimdi áskerı qyzmetti aıaqtaǵan sarbazdardy 51809 áskerı bóliminiń shtab bastyǵy podpolkovnık Nurjan Súleımenov quttyqtady.
Qyzmetin adal atqarǵan sarbazdarǵa alǵys hattar men estelik syılyqtar tabystaldy. Sonymen qatar 217 sarbazdyń beseýine shtab bastyǵy elimizdiń joǵary oqý oryndarynda bilim alýǵa grant sertıfıkattaryn berdi. Olardyń qatarynda aqtaýlyq qatardaǵy jaýynger Álıhan Ǵasanov ta bar. Ol on eki aıdaǵy qyzmet barysynda tártibimen jáne jaýyngerlik daıyndyqtaǵy úzdik nátıjelerimen kózge túsken.
– «Sarbaz 2.0» baǵdarlamasyna qatysyp, jaqsy upaı aldym. Endi men Sh. Esenov atyndaǵy Kaspıı tehnologııalar jáne ınjınırıng ýnıversıtetine qurylysshy mamandyǵyna túskim keledi. Ákem sııaqty qurylysshy bolam, - dedi qatardaǵy jaýynger.
Esterińizge sala ketsek, áskerı daıyndyqta úzdik nátıje kórsetken sarbazdarǵa joǵary oqý oryndarynda bilim alýǵa grant berý jónindegi Qorǵanys mınıstrliginiń bastamasy zań júzinde bekitilgen. Tańdaý krıterııleriniń negizgisi – jaýyngerlik daıarlyq kórsetkishteri, tártip, psıhologııalyq turaqtylyq jáne qyzmettik mindetterdi sapaly oryndaý.
Al Aqtóbe oblysynan shaqyrylǵan qatardaǵy jaýynger ıAroslav Şetının áskerı qyzmetin kelisimshart negizinde jalǵastyrýdy uıǵardy. Komandırlerine úıretkeni men jınaǵan tájirıbesi úshin alǵysyn bildirgen ıAroslav qysqa demalystan keıin Muǵaljar aýdanynyń Jem qalasynda qyzmetin jalǵastyrmaq.
Qazan aıynyń basynan beri Aqtaý garnızonynyń áskerı bólimderinen merzimdi qyzmetin aıaqtaǵan 1000-ǵa tarta sarbaz zapasqa shyǵarylǵanyn atap ótken jón.
Buǵan deıin eń boıshań sarbaz teńiz jaıaý áskerlerinde qyzmet etetinin jazǵan edik.