Aqtaý garnızonynda sarbazdyń ólimine qatysty komandırge qylmystyq is qozǵaldy
ASTANA. KAZINFORM – Aqtaýdaǵy áskerı bólim komandıriniń salǵyrttyǵynan merzimdi áskerı qyzmetshiniń qaza tabýyna baılanysty qylmystyq is sotqa joldandy.
2025 jyldyń 17 aqpanynda Aqtaý garnızonynyń áskerı bólimderiniń birinde komandırdiń qyzmettik mindetterine salǵyrt qaraýynan sarbaz R. Jaıǵalıevtiń qaza bolýyna baılanysty qylmystyq istiń tergeýi aıaqtaldy.
Tergeý barysynda bólim komandıri jeke quramdy baqylaýdy jáne qarýmen jumys isteý tártibin qamtamasyz etý boıynsha jarǵylar men vedomstvolyq buıryqtarda kózdelgen sharalardy qabyldamaǵany anyqtaldy, bul túptep kelgende qaıǵyly oqıǵaǵa sebep boldy.
Áskerı prokýrorlardyń úzdiksiz qadaǵalaýy jáne jedel-tergeý tobynyń úılestirilgen jumysy barysynda qysqa merzimde jetkilikti dálelder jınaqtalyp, qajetti sot saraptamalary júrgizildi.
Nátıjesinde qylmystyq is máni boıynsha qaraý úshin sotqa joldandy.
Sonymen qatar barlaý-shabýyl batalonynyń komandıri, onyń orynbasary jáne rota komandıri qyzmetterinen bosatyldy, 10 laýazymdy tulǵa tártiptik jaýapkershilikke tartyldy.
Áskerı qyzmetshilerdiń qaza tabýyna ákep soqqan qylmystar úshin jazanyń bultartpastyǵy qaǵıdatyn qamtamasyz etý jónindegi jumys Bas áskerı prokýratýra tarapynan jalǵastyrylady.
Eske sala keteıik, buǵan deıin Aqtaý garnızonynda sarbaz kóz jumǵanyn jazǵan edik.
