Aqtaý garnızonynda sarbaz qaıtys boldy
Aqtaý garnızonynda belgisiz zattyń jarylýynan áskerı qyzmetshi mert boldy, dep habarlaıdy QazAqparat tilshisi QR Qarýly kúshteri qurlyq áskerleriniń baspasóz qyzmetine silteme jasap.
«2023 jylǵy 30 qyrkúıekte Aqtaý garnızonynyń «Oımasha» oqý polıgonynda jumys barysynda belgisiz zat jaryldy. Saldarynan áskerı qyzmetshi túrli dárejede jaraqat aldy. Oqıǵa ornyna shuǵyl túrde jedel járdem brıgadasy shaqyryldy. Medıtsına qyzmetkerleriniń shuǵyl áreketine qaramastan, áskerı qyzmetshi aýrýhanaǵa barar jolda qaıtys boldy», - delingen habarlamada.
Belgili bolǵandaı, oqıǵa ornyna «Batys» óńirlik qolbasshylyǵy áskerleriniń qolbasshysy general-maıor D.Ospanov bastaǵan komıssııa jiberilgen.
«Oqıǵanyń sebebi men mán-jaıy anyqtalyp jatyr. Áskerı-tergeý organdary sotqa deıingi tekserýdi bastady. Tergeý múddesi úshin ózge aqparat jarııa etýge jatpaıdy. Qarýly kúshterdiń qurlyq áskerleriniń basshylyǵy qaıtys bolǵan áskerı qyzmetshiniń týǵan-týystary men jaqyndarynyń qaıǵysyna ortaqtasyp, kóńil aıtady», - deıdi áskerı vedomstvodan.
