Aqtaý garnızonda 600-den astam teńiz jaıaý áskeri jaýyngerlik synaqtan ótti
AQTAÝ. KAZINFORM – Mańǵystaý oblysyndaǵy «Oımasha» polıgonynda «Batys» óńirlik qolbasshylyǵy teńiz jaıaý áskerleri brıgadasynyń 600-den astam jas sarbazy alǵash ret jaýyngerlik daıyndyq boıynsha tájirıbelik sabaqtarǵa qatysty. Bul týraly Qorǵanys mınıstrliginiń baspasóz qyzmeti habarlady.
Bul is-sharalar jaýyngerler úshin kásibı daǵdylaryn qalyptastyrýdaǵy mańyzdy kezeń boldy. Áskerı qyzmetshiler kedergiler jolaǵynan ótip, AK-74 avtomatynnan oqý-jattyǵý atystaryn oryndady, sondaı-aq eń jaýapty synaqtardyń biri – tank astynan ótý synaǵy boldy.
Jıyn bastyǵynyń tárbıe jáne ıdeologııalyq jumystar jónindegi orynbasary gvardııa maıory Ratbek Qýatbekov bul jattyǵýdyń teńiz jaıaý áskerinen barynsha tózimdilik pen sabyrlyqty talap etetinin atap ótti.
– Qazirgi zamannyń jaýyngeri tek dene kúshi jaǵynan emes, rýhanı turǵydan da daıyn bolýy tıis. Tank astynan ótý – ishki qysymdy jeńip, óz-ózine degen senimdilikti nyǵaıtýǵa kómektesetin mańyzdy kezeń. Búgingi nátıjeler jas sarbazdardyń tapsyrmany laıyqty deńgeıde oryndaı alatynyn kórsetti, - dedi tárbıeshi ofıtser.
Kóptegen jaýynger úshin bul sabaqtar naǵyz synaq qana emes, qyzmettegi óz rólin tereń sezinýdegi mańyzdy qadam boldy.
– Búgin alǵash ret urys qarýynan oq attym. Bul – erekshe jaýapkershilik pen maqtanysh sezimi. Eń qıyn synaq tank astynan ótý boldy. Bul sát esimde máńgi saqtalady, - dedi Batys Qazaqstan oblysynan shaqyrylǵan qatardaǵy jaýynger Ádil Alhamov.
Aldaǵy demalys kúnderi jas sarbazdar Áskerı ant berip, teńiz jaıaý áskerleri brıgadasynyń shabýyldaýshy batalondarynyń qataryna resmı túrde qosylyp, Otan qorǵaý jolyndaǵy qyzmetin bastaıdy.
Buǵan deıin áskerı bólimshelerge jasandy ıntellektisi bar beınebaqylaý nege kerek ekenin jazǵan bolatynbyz.