Aqtaý áýejaıynda joǵalǵan aqsha kesirinen tranzıttik reıs jolaýshylary bógeldi
ASTANA.QazAqparat - Shymkent-Aqtaý baǵytymen ushyp kelgen jolaýshylardyń biriniń aqshasy joǵalýyna baılanysty áýejaıda basqa jolaýshylardy uzaq ýaqyt ustaǵan, dep habarlaıdy «Lada».
Oqıǵa 8 maýsym kúni Aqtaý halyqaralyq áýejaıynda boldy. Shymkentten kelgen jolaýshylardyń biri áýejaı qyzmetkerlerine shaǵym aıtyp vıdeo túsirgen. Vıdeodan qyzmetkerlerdiń áıeldiń ne úshin ustap otyrǵandary jaıly suraǵyna jaýap bermeı turǵandyǵyn kórýge bolady.
«Bizdi áýejaıda 40 mınýttan artyq ustady. Ushaqtan balalarymyzben onsyz da sharshap tústik... Jáne eń bastysy bizdi ustaý sebepterin túsindirmedi. Keıinnen ushaqta otyrǵan bir áıeldiń sómkesinen 650 myń teńge aqshasy joǵalǵandyǵy belgili boldy. Ol janjal shyǵaryp, sonyń saldarynan bizdi ustap otyrǵan», - deıdi Shymkent-Aqtaý baǵytyndaǵy ushaqtyń jolaýshysy.
«Bul tranzıttik reıs bolatyn. Kóptegen jolaýshylar ary qaraı ushyp ketýi kerek edi. Ushaq Aqtaýǵa qonysymen jolaýshylardyń biri iri kólemdegi aqshasyn joǵaltqandyǵyn habarlady. Áýejaı qyzmetkerleri erejege saı áreket jasady. Zardap shekken áıelge jaqyn otyrǵan jolaýshylar tekserilip, túsinik berý úshin polıtsııa pýnktine jetkizildi, qalǵan jolaýshylar ushyp kelý alańynda jaǵdaı anyqtalǵanǵa deıin otyrdy. Keıinnen joǵalǵan aqsha tabylyp, jolaýshylar bosatyldy», - dep túsindirdi áýejaı basshylyǵy.
