Aqtaý áýejaıy aýmaǵynda qańǵybas ıt 7 jasar balaǵa shabýyl jasady
Jábirlenýshilerdiń týystary oqıǵa týraly aıtyp berdi. Olardyń sózinshe ákesi balany qorǵaýǵa tyrysyp, jaraqat alǵan.
Oqıǵa 5 qazanda Aqtaý halyqaralyq áýejaıynyń aýmaǵynda saǵat 13:00 shamasynda bolǵan. It jeti jasar balaǵa shabýyl jasady. Ákesi balasyn qorǵaýǵa umtylǵan. Áýejaı medıtsınalyq qyzmetiniń qyzmetkeri zardap shekkenderge qajetti alǵashqy kómekti kórsetti. Keıin ákesi men uly oblystyq aýrýhananyń dárigerlerine júgingen.
«Búginde ákesiniń jarasy kúsheıip ketti. Bilegi isinip, qatty aýyrsyný bar. Bala jaraqat alyp, ákesimen birge emdelý kýrsynan ótedi. Bala psıhologııalyq turǵydan zardap shekti. Ákesi men ıttiń kúresin kórdi. Aqtaý áýejaıynyń ókilderi zardap shekkenderdiń jaı-kúıin bilý úshin eshqandaı áreket jasamady. Biz jolaýshylar men áýejaıǵa kelýshilerdi áýejaı aýmaǵynda osyndaı qaýip bary týraly eskertkimiz keledi», - dedi balanyń anasy.
Áýejaı ókilderi shabýyl faktisin rastady. Budan bólek, qańǵybas janýarlardy aýlaıtyn kompanııamen kelisim jasalǵanyn habarlady.
«Bul ıttiń áýejaı aýmaǵynda júrgenine birneshe kún boldy. Adamdarǵa shabýyldaǵan emes. Meniń oıymsha, bala ıtti shaqyryp sıpaǵysy kelgen bolýy kerek. Balanyń bul áreketi ıtke unamaǵan bolar. Shyndyǵynda buǵan deıin qańǵybas janýarlardy aýlaıtyn mamandardy shaqyrǵan edik. Biraq olardyń jumystarynyń kóptigine baılanysty kelýge ýaqyty bolmady. Oqıǵa ornynda zardap shekkenderge alǵashqy medıtsınalyq kómek kórsetildi», - dedi áýejaı ókili.
Áýejaı ókiliniń aıtýynsha, mundaı oqıǵa alǵash ret oryn aldy.