Aqtaý áýejaıyndaǵy perronnyń 90%-y jańartyldy
ASTANA. KAZINFORM – Aqtaý halyqaralyq áýejaıynda aerodrom ınfraqurylymyn jańǵyrtý jumystary jalǵasyp jatyr. Qazirgi ýaqytta perrondy kúrdeli jóndeý jumystarynyń 90%-y aıaqtalǵan.
Kólik mınıstrliginiń málimetinshe, joba 2024 jyly bastalǵan aerodrom jabyndaryn keshendi jańǵyrtý jumystarynyń jalǵasy bolyp tabylady.
Jobanyń birinshi kezeńinde ushý-qoný jolaǵy men rýldeý joldary qaıta jańartylyp, jumystar 2025 jyldyń shilde aıynda tolyq aıaqtalǵan.
Al bıylǵy mamyr aıynan bastap jobanyń ekinshi kezeńi júzege asyrylyp jatyr. Ol reısterdi toqtatpaı-aq perron men áýejaıdyń perımetrlik ınfraqurylym nysandaryn jóndeýdi qamtıdy.
«Qazirgi ýaqytta jabynnyń qalǵan bóligin tóseý, perımetrlik qorshaýdy ornatý jáne qosymsha jaryqtandyrý júıelerin jabdyqtaý jumystary júrgizilýde. Barlyq jumystardy 2026 jyldyń úshinshi toqsanynyń sońyna deıin aıaqtaý josparlanyp otyr», – delingen habarlamada.
Vedomstvonyń málimetinshe, jańǵyrtý jumystary ushý qaýipsizdigin arttyryp, áýe kemeleriniń turaq oryndaryn keńeıtýge jáne olardyń kótergishtik qabiletin kúsheıtýge múmkindik beredi.
Sondaı-aq joba aýyr júk ushaqtaryna qyzmet kórsetý múmkindigin qamtamasyz etedi.
Jańǵyrtý aıaqtalǵannan keıin Aqtaý áýejaıy barlyq úlgidegi, onyń ishinde «F» sanatyndaǵy áýe kemelerin qabyldaı alady.
Aıta keteıik, Pavlodar áýejaıyndaǵy qurylys jumystary shilde aıynyń ortasynda aıaqtalady.
