Aqtaý áýejaıynda jolaýshylar reısti 20 saǵat kútýge májbúr boldy
AQTAÝ. KAZINFORM – Jolaýshylar Aqtaý-Almaty baǵyty boıynsha ushpaq bolǵan. Alaıda 6 shilde kúni saǵat 02:05-ke josparlanǵan reıs birneshe ret keshiktirilgen. Jolaýshylar narazylyqtaryn áleýmettik jelide bildirdi.
Al, FlyArystan áýe kompanııasynyń habarlaýynsha, reıstiń keıinge shegerilýine ushaqtyń keshigýi sebep bolǵan.
- Aqtaý – Almaty baǵytyndaǵy bastapqyda 02:05-ke josparlanǵan FS 7178 reısi ushaqtyń kesh kelýine baılanysty aldymen jergilikti ýaqyt boıynsha saǵat 06:45-ke shegerilgen. Jolaýshylarǵa sýsyndar men ystyq tamaq usynyldy. Keıin óndiristik qajettilikke baılanysty ushý ýaqyty 22:30-ǵa aýystyryldy, - delingen habarlamada.
Áýe kompanııasy jolaýshylarǵa qoldanystaǵy erejelerge sáıkes barlyq jaǵdaı jasalǵanyn, basqa reısterge tegin brondaý nemese bılet qunyn tolyq qaıtarý múmkindigi baryn jetkizgen.
- Áýe kompanııasyn júgingen (23 adam) jolaýshylardyń suraýy boıynsha olar qonaqúılerge ornalastyryldy. Bul protsess tańǵy 9:30-dan bastap kezeń-kezeńimen júrgizildi. Óıtkeni qonaqtardyń standartty shyǵý ýaqytynan keıin nómirlerdi daıyndaý úshin qonaqúıge ýaqyt qajet boldy (chekaýt 9:00-dan), - delingen kompanııa taratqan habarlamada.
FlyArystan áýe kompanııasynyń habarlaýynsha, qazirgi ýaqytta Aqtaý áýejaıynda reısti kútip otyrǵan jolaýshylar joq.
Buǵan deıin, Aqtaýda múgedekterdi qaıyr suraýǵa májbúrlegen otbasy músheleri sottalǵany týraly jazǵan bolatynbyz