Aqtaý áýejaıynda avtoturaq baǵasy negizsiz kóterilgeni úshin tekseris bastaldy
AQTAÝ. KAZINFORM – Mańǵystaý oblysy boıynsha Básekelestikti qorǵaý jáne damytý agenttigi departamenti Aqtaý halyqaralyq áýejaıynyń avtoturaǵyna qatysty baǵany kóterý jáne básekelestik qaǵıdalaryn buzý kúdigi boıynsha tergep-tekserýdi bastady. Bul týraly agenttiktiń baspasóz qyzmeti málim etti.
Málim bolǵandaı áýejaı avtoturaqta 15 mınýttan artyq turǵany úshin 500 teńge mólsherinde aqy alatyn bolǵan. Baǵanyń negizsiz ósýi — tekseriske sebep bolyp otyr.
«Aldyn ala nátıjeler, áýejaı qyzmetterin paıdalanatyn halyqtan qarjy alý arqyly shamadan tys paıda kórý maqsatynda teris paıdalanýy yqtımal ekendigin meńzeıdi», — delingen habarlamada.
Qazirgi ýaqytta Mańǵystaý oblysy boıynsha departament oblys ákimdigimen jasalǵan kontsessııalyq kelisimdi taldap, «ATM Grup» JShS fılıalynyń qyzmetin tekserýde. Eger monopolııaǵa qarsy zańnamanyń buzylǵany rastalsa, kontsessııalyq kelisimdi buzý nemese onyń sharttaryn ózgertý týraly nusqama beriledi.
Eske sala keteıik, buǵan deıin Astana qalasy Básekelestikti qorǵaý jáne damytý agenttigi departamentiniń eskertýinen keıin elorda áýejaıy aqyly turaq aımaqtarynda baǵany kóterýden bas tartqanyn jazǵan edik.
Sebebi, oǵan deıin Astana áýejaıynyń resmı Instagram paraqshasynda aqyly turaq aımaqtarynda tarıfterdiń kóteriletini týraly aqparat jarııalanǵan bolatyn.
Aqparat quraldarynda da Astana áýejaıynda avtoturaq qymbattaıtyny jarııalanǵan edi.
Básekelestikti qorǵaý jáne damytý agenttiginiń málimetinshe, eskertýden keıin Nursultan Nazarbaev halyqaralyq áýejaıy aqyly turaq aımaqtarynda baǵanyń kóterilýine jol bermeý sharalaryn qabyldady.
