Aqtaý áýejaıy Tegerannan kelgen ekinshi charterlik reısti qabyldady
AQTAÝ. KAZINFORM –Naýryz merekesine oraı Aqtaýǵa Tegerannan ekinshi charterlik reıspen týrıster keldi.
Byltyr alǵash ret «Tegeran - Aqtaý - Rixos Water World Aktau» baǵyty iske qosylǵan bolatyn. Tegerannan Aqtaýǵa charterlik reısterdiń ekinshi legi - týrıstik baǵyttar salasyndaǵy tabysty jumystyń jalǵasy bolyp otyr.
Iranda Naýryz meıramy 20 naýryzdan bastalady. Bul bizdiń elimizdegi Naýryz merekesimen sáıkes keledi. Parsy elinde Ulystyń uly kúni merekesinde ulttyq salt-dástúrler keńinen kórsetiletin mádenı is-sharalardy uıymdastyrýymen ótedi.
«Byltyr bizdiń óńirge Tegeran-Aqtaý baǵyty boıynsha kóktemgi merekeni toılaýǵa bortta 197 jolaýshymen 2 charterlik reıs ushty. Qonaqtar Naýryz merekesinde qazaq mádenıeti men dástúrlerimen tanysty. Bıyl charterlik reıster sany 3 esege artty. Al jolaýshylardyń jalpy sany 870 adamǵa deıin jetedi dep kútilip otyr. Bul týrısterdiń qazaq mádenıetine degen qyzyǵýshylyǵynyń artýyn jáne elder arasyndaǵy týrızm salasyndaǵy yntymaqtastyqtyń nyǵaıǵanyn dáleldeıdi», - dedi «Rixos Water World Aktau» qonaq úıiniń ókilderi.
Osy oraıda Aqtaý ákimdiginiń baspasóz qyzmeti osy baǵyt boıynsha jazǵy maýsymda charterlik reısterdi jalǵastyrý josparlanyp otyrǵanyn málimdedi. Bul óńirdegi týrıstik salanyń damýyna óz septigin tıgizbek. Sonymen qatar, Mańǵystaý oblysynyń Ortalyq Azııadaǵy týrıstik baǵyt retindegi tartymdylyǵyn aıqyndaıtyn bolady.
