Aqtaý, Atyraý jáne Aqtóbe garnızondarynda jas sarbazdar ant berdi
Saltanatty sharaǵa sarbazdardyń týǵan-týysqandary, Qarýly kúshterdiń ardagerleri, bılik organdary men qoǵamdyq uıymdardyń ókilderi qatysty. Qonaqtardyń nazaryna áskerı qyzmetshilerdiń jaýyngerlik daıarlyǵy kórsetildi. Áskerı qyzmetshilerdiń týysqandary boryshyn óteıtin sarbazdardyń jaǵdaıymen tanysty, bólim qolbasshylyǵymen kezdesti.
Rásim áskerı bólimderdiń aýmaǵy jáne Jaýyngerlik dańq eskertkishteri aldyndary men qalalyq saıabaqtarda ótti. Aqtóbe qalasynda jas sarbazdardyń áskerı ant berýi Qazaqstan Respýblıkasynyń Tuńǵysh Prezıdenti parkinde ótse, al Atyraý qalasynda Jeńis saıabaǵynyń aýmaǵynda uıymdastyryldy. Aqtaý jáne Beıneý eldimekenderinde is-shara áskerı bólim aýmaǵynda ótti. Ant qabyldaǵan sarbazdardyń uzyn sany 700-ge jetse, olardy qoldaýǵa elimizdiń shet-shetinen 1 500-ge jýyq jaqyn-týysqany keldi.
«Jaýgershilik zamandarda sarbazdar eldiń erkindigi, namysy úshin jan aıamasqa serttesip, qylyshtyń júzin súıip ant bergen. El qorǵaý mindetin óterde ant berý salty qazir jańa mazmunmen baıydy. Sizder, búgin Qarýly kúshterdiń qataryna alynǵan, Qazaqstan halqy men onyń zańdy saılanǵan Prezıdentine aqtyq demderin qalǵansha adal bolýǵa, Konstıtýtsııa men zańdardy qasterlep saqtaýǵa saltanatty túrde ant etesizder», - dedi «Batys» óńirlik qolbasshylyǵynyń áskerleri qolbasshysy Nurlan Aldııarov sarbazdarǵa.
«Dál osy meıram kúni ant qabyldaý men úshin zor qurmet. Barsha qazaqstandyqtardy Qazaqstan Respýblıkasynyń Tuńǵysh Prezıdenti kúnimen quttyqtaǵym keledi! Biz Otanymyzdyń ıgiligi úshin ózimizdiń áskerı boryshymyzdy adal oryndaıtynymyzǵa senimdi túrde aıta alamyn», - dedi gvardııanyń qatardaǵy jaýyngeri Vladımır Koldın.
Áskerı ant qabyldaǵan jas sarbazdar endigi kezekte jas mamandardy daıarlaý baǵdarlamasyna sáıkes jaýyngerlik úrdiske kirisedi. Jarty jyldan soń olar áskerı mamandyq ıesi atanyp, artıllerııashy, tankishi, atqysh, baılanysshy laýazymdarynda tolyqqandy Otan qorǵaýshylar mártebesine ıe bolady.
