Aqtaý-Astana reısi tehnıkalyq aqaýǵa baılanysty keshikken

AQTAÝ. QazAqparat – Scat áýe kompanııasynyń jolaýshylary Aqtaýdan Astanaǵa usha almaı jatyr. Áýe kompanııasy ushaqtyń keshigý sebebin áýe kemesine qosymsha tehnıkalyq qyzmet kórsetý qajettigimen túsindirdi, dep habarlaıdy QazAqparat Lada.kz-ke silteme jasap.

Scat áýe kompanııasynyń ushaǵy Aqtaýdan Astanaǵa 18 tamyz tańǵy saǵat 6-da ushýy tıis edi.

Jolaýshylardyń aıtýynsha, áýe kompanııasy olarǵa reıstiń keshigetinin eskertpegen. Oǵan qosa, osy ýaqyt ishinde olarǵa reıstiń kidirý sebebin de eshkim túsindirmegen. Olar áýejaı qyzmetkerlerinen surap bilgen – keshigý sebebi tehnıkalyq aqaýmen baılanysty bolǵan.

«Ushýǵa daıyndyq aldynda qosymsha tehnıkalyq qyzmet kórsetý qajet ekeni anyqtaldy. Jolaýshylarǵa kútý kezinde barlyq qajetti zat usynyldy, sonyń ishinde tamaq ta bar. Jolaýshylardyń qaýipsizdigi – áýe kompanııasynyń basty áleýeti», - dep túsindirdi Scat áýe kompanııasynan.