Aqtaý - «Aqyldy úıge» qosylýdy bastaǵan alǵashqy qala
AQTAÝ. QazAqparat - 12 shildede Mańǵystaý oblysy ákimdigi men «Qazaqtelekom» AQ turǵyn úılerdiń qaýipsizdigi men jaılylyǵyn qamtamasyz etýge arnalǵan ınnovatsııalyq ónim - «Aqyldy úıdi» usyndy, dep habarlaıdy QazAqparat Mańǵystaý oblysy ákimdigine silteme jasap.
Baspapóz málimetterine qaraǵanda, bul ónim naqty ýaqyt rejıminde úıde bolyp jatqan jaǵdaılardy baqylaýǵa, oqys jaǵdaılar týraly jedel aqparat alýǵa múmkindik beredi.
Jańa servıstiń tusaýkeserine Mańǵystaý oblysynyń ákimi Eraly Toǵjanov, «Qazaqtelekom» AQ Basqarma tóraǵasy Qýanyshbek Esekeev qatysty.
Aqtaý qalasynyń 15-yqsham aýdanyndaǵy № 35 úı «Qazaqtelekom» AQ qosqan kúzet jáne órt qaýipsizdiginiń zııatkerlik tetikteri bar Qazaqstandaǵy eń alǵashqy «Aqyldy úı» boldy.
«Aqyldy úıdiń» symsyz beınekamera, qozǵalys, esiktiń ashylý tetikteri qosylǵan óziniń baqylaýshysy bar. Detektorlar qozǵalysty, esik nemese terezeniń ashylǵandyǵyn, bir nárseniń janyp jatqandyǵyn lezde baǵdarlaıdy, al beınekamera oqıǵany tirkep, sýretti esep jiberedi. Týyndaǵan qıyndyq týraly úı ıesine smartfonǵa ornatylǵan utqyr qosymsha arqyly jedel habar beriledi. Atap ótý kerek, páter ıeleriniń jabdyqty satyp alýynyń qajeti joq, ótinim boıynsha «Qazaqtelekom» AQ jabdyqty ózderi ákelip, ornatady, qurastyrý ýaqyty 40 mınýttan aspaıdy.
«Aqyldy úı» páterdiń keshendi qorǵalýyn qamtamasyz etýge múmkindik beredi. Turǵyndar endi qaskúnemderdiń úıge kirýi nemese úı ıesiniń joq kezde bolýy yqtımal apattarǵa alańdamaıtyn bolady. Júıe uıaly telefonǵa habarlama jiberip, kez kelgen qıyndyq týraly lezde eskertedi. Páterde naqty ne bolyp jatqanyn jáne kómek shaqyrýdyń qanshalyqty qajet ekendigin utqyr qosymsha arqyly kirip, kóre alady.
Sonymen birge 35-úıdiń turǵyndary qazaqstandyqtar arasynda keńinen qoldanylatyn «Bultty beınebaqylaý» qyzmetine qosyla alady. «Bultty beınebaqylaý» qyzmeti bizdiń abonentterge óz úıiniń janynda jáne podezde bolyp jatqan oqıǵalardy naqty ýaqyt rejıminde uıaly qurylǵysy nemese derbes kompıýteriniń kómegimen baqylaýǵa múmkindik beredi.
Jobanyń ereksheligi: sýrettiń sapasy óte joǵary, kirgen adamnyń bet-beınesin dál aıyrýǵa bolady jáne arhıvtegi beınejazbalarǵa ońaı qol jetkizedi, jazbalar 7 kúnge deıin saqtalady. Podezge biryńǵaı beınebaqylaý jelisine qosylǵan eki beınekamera ornatylady, olar podezderge kireberis pen olardyń aldyndaǵy aýla alańdaryn túsiredi.
Bul baǵyttaǵy joba aıasynda «Qazaqtelekom» AQ aǵymdaǵy jyly Aqtaý qalasy men Jańaózen qalasynda 250 úıge 1650 beınekamera ornatyp, kóp qabatty turǵyn úı sektorynyń 62 myńnan astam turǵynyn «Bultty beınebaqylaý» qyzmetine qatynaýyn qamtamasyz etedi.
Kezdesý barysynda «Qazaqtelekom» AQ-nyń taǵy bir jańa ónimi - «Aqyldy TKSh» qyzmeti tanystyryldy, páterler men úılerge kún saıyn tutynylǵan sýdyń, gazdyń, elektr energııasynyń nemese jylýdyń sany týraly resýrstyq kompanııaǵa habarlar berip otyratyn aqyldy quraldar ornatylady.
«Aqyldy TKSh» resýrstardyń naqty qansha paıdalanylǵandyǵy, túrli avarııalyq jaǵdaılar nemese urlyq kezindegi shyǵynnyń qansha ekendigi týraly ózekti aqparatty alýǵa múmkindik beredi. Bul ónim resýrstyq kompanııalardyń «kúrdeli» oryndardy anyqtaýyna jáne olardy jóndeý jumystaryn josparlaý múmkindigimen qalpyna keltirýine yqpal etedi.
