Aqtaý «aqyldy» qalaǵa aınalady
Bul «Aqyldy qala» jobasy arqyly iske asyrylady. «Tsıfrlyq Qazaqstan» memlekettik baǵdarlamasy aıasynda Mańǵystaý oblysynyń ákimdigi men elimizdegi eń iri telekommýnıkatsııa kompanııasy «Qazaqtelekom» AQ 4 memorandýmǵa qol qoıdy. Yntymaqtastyq aıasynda taraptar Aqtaý qalasynda «SmartCity» pılottyq jobasyn júzege asyrýǵa shart jasasty.
Osylaısha, qala kóshelerinde jáne joldarda sońǵy úlgidegi zamanaýı vıdeobaqylaý júıesi, tegin Wi-Fi, jedel-járdemniń dıspetcherlik qyzmetin avtomattandyrý sııaqty baǵdarlamalar júzege asyrylady. Osyǵan deıin, Arys qalasynda tsıfrlandyrylǵan gadjetter turǵyn-úılerdiń qurylysy men áleýmettik nysandardy baqylaýǵa múmkindik bergen edi.
«Bul – týrıstik ólke, munaı-gaz kásibi damyǵan, jańa tehnologııalarymyz: «Big data» óńirdegi kásipterdiń ekonomıkalyq tıimdiligin arttyrýǵa, ekologııaǵa zııandy zattardyń shyǵarylýyn azaıtýǵa múmkindik beredi. Sonymen qatar, árbir týrısti qaı óńirden keletinin, ony qandaı qyzmet qyzyqtyratyny týraly aldyn ala bilýge bolady. «Big data» boıynsha osy derekterdi bilý arqyly optımaldy sheshim qabyldaýǵa bolady. «Aqyldy qala» jobasy óte tıimdi. Ol 2020 jyly aıaqtalady dep kútilýde», - deıdi «Qazaqtelekom« kompanııasynyń ókili Samat Imbaev.